ကလေးနည်းပညာတက္ကသိုလ် တတိယနှစ် ကျောင်းသား တစ်ဦးအပါအဝင် ချင်းဒေသကာကွယ်ရေးတပ်သားနှစ်ဦး မိုင်းမတော်တဆပေါက်ကွဲ၍ ကျဆုံးခဲ့သည်ဟု ဒေသခံများထံမှ သိရသည်။
အကြမ်းဖက်စစ်ကောင်စီတပ်နှင့် တိုက်ပွဲပြင်းထန်နေသည့် ချင်းပြည်နယ်၊ တီးတိန်မြို့နယ်၊ ဟိန်ဇိန်ရွာတွင် အကြမ်းဖက်စစ်ကောင်စီက ရဟတ်ယာဉ်ဖြင့် လေကြောင်းတိုက်ခိုက်ပြီးနောက်မိုင်းကွင်းကို သွားရောက်စစ်ဆေးစဉ် မိုင်းမတော်တဆဖြစ်ကာ ကျဆုံးခဲ့ခြင်းဖြစ်သည်။
မိုင်းမတော်တဆမူကြောင့် ချင်းအမျိုးသားတပ်(CNA)မှ ဆလိုင်း ကျူံးလျန်ဆန်နှင့် မောင်မုန့်နိုးတို့ ကျဆုံးခဲ့ခြင်းဖြစ်သည်။ အသက် ၂၁ နှစ်အရွယ် ကလေးနည်းပညာတက္ကသိုလ် တတိယနှစ်ကျောင်း မောင်မုန့်နိုးသည် ချင်းပြည်ကာကွယ်ရေးတပ်CDF(Zoland)မှ တပ်သားတစ်ဦးဖြစ်သည်။
ချင်းပြည်နယ်၊ တီးတိန်မြို့နယ် ကလေး-တီးတိန်လမ်းမပေါ်ရှိ ဟိန်ဇိန်ကျေးရွာ အနီးတဝိုက်တွင် ဒေသခံကာကွယ်ရေးတပ်များနှင့် အကြမ်းဖက်စစ်ကောင်စီတို့ကြား ဇန်နဝါရီ ၁၃ ရက်ကတည်း တိုက်ပွဲများပြင်းထန်နေသည်။
ချင်းတောင်ပေါ် စစ်ကြောင်းထိုးတက်လာသည့် အကြမ်းဖက်စစ်ကောင်စီတပ်များကို ပြည်သူ့ကာကွယ်ရေးတပ်များဖြစ်သည့် CDM Siyin၊ PDF Zoland ၊Zogam Army၊ People’s Defence Army (PDA) ၊CNDF ၊ PDF(ကလေး) တို့ ပူးပေါင်း ခုခံတိုက်ခိုက်နေခြင်းဖြစ်သည်။
အကြမ်းဖက်စစ်ကောင်စီတပ်က ဒေသခံကာကွယ်ရေးတပ်များကို လေကြောင်းပစ်ကူနှင့် လက်နက်ကြီးပစ်ကူများ အဓိကအားကိုး၍တိုက်ခိုက်နေသည်။