စစ်ကိုင်းတိုင်း ထီးချိုင့်မြို့ အထွက် စစ်ဆေးရေးဂိတ်သို့ ကင်းပတ်လာသည့် စစ်ကောင်စီတပ်ကို မိုင်းခွဲတိုက်ခိုက်ခဲ့ရာ စစ်ကောင်စီတပ်မှ ၆ဦး သေဆုံးထိခိုက်ခဲ့ကြောင်း ထီးချိုင့် ပြည်သူ့ကာကွယ်ရေးအဖွဲ့(ပကဖ)တာဝန်ရှိသူတစ်ဦးက ပြောသည်။
ယနေ့ (ဇန်နဝါရီ ၂၃ရက်) ညနေ ၄နာရီခန့်တွင် မြို့အထွက် စစ်ဆေးရေးဂိတ်သို့ ကင်းပတ်လာသည့် အင်အား ၈ဦးပါ စစ်ကောင်စီတပ်၏ ကားကို ထီးချိုင့်ပြည်သူ့ကာကွယ်ရေးတပ်(PDF)နှင့် ပကဖ
ပူးပေါင်းအဖွဲ့မှ မိုင်းဖြင့် တိုက်ခိုက်ခဲ့ခြင်းဖြစ်သည်ဟုဆိုသည်။
စစ်ကောင်စီတပ်မှ ၂ဦးသာ ကားထဲမှ ဆင်းနိုင်ခဲ့ပြီး ကျန် ၆ဦးမှာ သေဆုံးဒဏ်ရာရရှိခဲ့ကြောင်း ပကဖ တာဝန်ရှိသူက ပြောသည်။
အဆိုပါတိုက်ခိုက်မှုဖြစ်စဉ်တွင် ပြည်သူ့ရဲဘောများ ထိခိုက်မှုမရှိ ပြန်လည်ဆုတ်ခွာနိုင်ခဲ့သည်ဟုလည်းပါရှိသည်။
ထီးချိုင့်မြို့နယ်တွင် စစ်ကောင်စီတပ်ယာဉ်နှင့် စစ်ကြောင်းများကို ပြည်သူ့ကာကွယ်ရေးအဖွဲ့များက ယခုလအတွင်း ခုခံတိုက်ခိုက်မှုများ ဆက်တိုက်လုပ်ဆောင်ခဲ့၍ စစ်ကောင်စီတပ်မှ သေဆုံးထိခိုက်များခဲ့သည်။