မန္တလေးမြို့ ပြည်ကြီးတံခွန်မြို့နယ်ရှိ စက်မှုပန်းခြံလမ်းဆုံရှိ စစ်ကောင်စီလက်ပါးစေ ဆက်ကြေးကောက်သည့်အဖွဲ့အား ဖောက်ခွဲတိုက်ခိုက်ခဲ့ကြောင်း မြို့ပြပြောက်ကျားတပ်ဖွဲ့တစ်ခုဖြစ်သည့် Mandalay Ranger Force-PDFကထုတ်ပြန် သည်။
ပြည်ကြီးတံခွန်မြို့နယ် (၆၂)လမ်းနှင့် စက်မှုပန်းခြံလမ်းဆုံ၌ အများပြည်သူထံမှ မတရားဆက်ကြေးကောက်ခံနေသည့် စစ်ကောင်စီလက်ပါးစေများအား ဗုံးတစ်လုံးဖြင့် ပစ်ခတ်တိုက်ခိုက်ခဲ့ကြောင်း ထုတ်ပြန်ချက်တွင် ဖော်ပြသည်။
“ရဲတစ်ယောက် ဒလန်တစ်ယောက် စိမ့်သွားတယ်လို့ သိရပါတယ်။ နောက်ဆက်တွဲသတင်းမသိရသေးပါ။ သိရင်လာပြောနိုင်ပါတယ်”ဟု MRF-PDF က ဆိုသည်။
စစ်ကောင်စီအသိုင်းအဝိုင်းနှင့် နီးစပ်သူများ၏ အဆိုအရ ယနေ့(ဇန်နဝါရီ ၂၄)ညနေ ၄ နာရီခန့်က ဖြစ်ပွားသည့် အထက်ပါပေါက်ကွဲမှုတွင် အမျိုးသမီးသုံးဦးနှင့် အမျိုးသားတစ်ဦး ထိခိုက်ဒဏ်ရာများရရှိခဲ့ကြောင်း သိရသည်။
“(ဗုံးဖေါက်)ခွဲပြီး (စစ်ကောင်စီတပ်)ကားတွေရောက် လာတယ်။ ကျန်တာတော့ မသိတော့ဘူး။ ကျွန်တော်တို့ (ဆုတ်ခွာ)ရွှေ့ခဲ့ပြီ”ဟု MRF-PDF တပ်ဖွဲ့ဝင် ရဲဘော်တစ်ဦးက လူထုနွေဦးသို့ ပြောသည်။
ယနေ့(ဇန်နဝါရီ ၂၄)နံနက်ပိုင်းကလည်း ပြည်ကြီးတံခွန်မြို့နယ်ရှိ ရတနာပုံ(စ)စျေးအနီး စစ်ကောင်စီ ၏ သတင်းပေးဒလန်ဆိုသူတစ်ဦး သေနတ်ဖြင့် ပစ်သတ်ခံခဲ့ရသည်။