ကရင်အမျိုးသားအစည်းအရုံး(KNU) တပ်မဟာ (၅)ထံသို့ အကြမ်းဖက်စစ်ကောင်စီတပ်မှ တပ်သားတစ်ဦး ထပ်မံလာရောက်ပူးပေါင်းလာကြောင်း တပ်မဟာ(၅)က ယနေ့ ဇန်နဝါရီ ၂၈ရက်တွင် သတင်းထုတ်ပြန်သည်။
ဖာပွန်မြို့တွင် ယခုလာရောက် အခြေချသည့် အကြမ်းဖက်စစ်ကောင်စီ၏ ခမရ(၆၄၂)မှတပ်သား မျိုးလွင်ဦးသည် အကြမ်းဖက်စစ်ကောင်စီ၏ လုပ်ရပ်အား မကြိုက်နှစ်သက်တော့သည့်အတွက် ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ (၅)သို့ လာရောက်အလင်းဝင်ခဲ့ ကြောင်း လက်နက်နှင့်အတူလာရောက်သည့် တပ်သား၏ပုံကို ဖော်ပြထားသည်။
ပြီးခဲ့သည့် ဇန်နဝါရီလဆန်းပိုင်းကလည်း ခမရ (၄၃၉)တပ်မှ တပ်သားသုံးဦး တပ်မဟာ(၅)ထံ လာရောက်ခိုလှုံဖူးသည်။
ရှေ့တန်းတပ်စခန်းမှ အရာရှိများ၏ အနိုင်ကျင့်မှုနှင့် စားနပ်ရိက္ခာပြတ်လပ်မှုတို့ကြောင့် ခမရ(၄၃၉) အခြေစိုက်ရာ စောမူပလောစခန်းအား စွန့်ခွာကာ လက်နက်သုံးလက်နှင့်အတူ ပူးပေါင်းလာခြင်းဖြစ်ကြောင်း KNU တပ်မဟာ(၅)က ဇန်နဝါရီ ၇ရက်တွင် ထုတ်ပြန်ထားသည်။
စစ်တပ်အာဏာသိမ်းပြီးနောက်ပိုင်း KNU တပ်မဟာ (၅)ထံ လက်နက်ချက်အလင်းဝင်လာသူ ၅၀ကျော်ရှိပြီဖြစ်ကြောင်း တပ်မဟာ(၅)၏ ထုတ်ပြန်ချက်များ၌ တွေ့ရသည်။
လက်နက်ချ အလင်းဝင်လာသူ အများစုမှာ စကခ (၈)လက်အောက်ခံတပ်ရင်းမှ တပ်သားအများစုဖြစ်သည်ဟု ဆိုသည်။
” ဒီလို အမြင်မှန်ရပြီး လက်နက်ချ အလင်းဝင်လာသူ အကြမ်းဖက်စစ်ကောင်စီတပ်သားတွေကို ကျွန်တော်တို့ဘက်ကတော့ လှိုက်လဲပျူငှာစွာနဲ့ လက်ခံကြိုဆိုပါတယ်။ ရှေ့လျှောက် အနာဂတ် ဘာလုပ်ချင်၊ ဘာဖြစ်ချင် တာကတော့ သူတို့အပေါ်မှာပဲမူတည်တယ်။ ကျွန်တော်တို့နဲ့ နေသွား ရင်လည်းလက်ခံတယ်။ သူတို့အိမ်ပြန်ချင်တယ်ဆိုရင်လည်း အတက်နိုင်ဆုံး စီစဉ်ပေးပါတယ်”ဟု တပ်မဟာ(၅) တပ်မဟာမှူး ဗိုလ်မျူးချုပ် စောမူဟဲက ပြောဆိုထားသည်။