လေးကေ့ကော်ဒေသ တိုက်ပွဲများကြောင့် ထွက်ပြေးလာသူများကို ယာယီထားရှိသည့် ထိုင်းနိုင်ငံ မဲဆောက်မြို့နယ် မဲ့ကိုကင်းစစ်ရှောင်စခန်းကို ယမန်နေ့က ပိတ်သိမ်းလိုက်ကြောင်း နယ်စပ်တွင် နေထိုင်သူတစ်ဦးက ပြောသည်။
၂၀၂၁ ဒီဇင်ဘာလလယ်က စတင်ခဲ့သည့် ကရင်ပြည်နယ် မြ၀တီမြို့နယ် လေးကေ့ကော်မြို့သစ်ဒေသ တိုက်ပွဲများကြောင့် ဒေသခံထောင်နှင့်ချီပြီး ထိုင်းနိုင်ငံဘက်သို့ တိမ်းရှောင်ခဲ့ခြင်းဖြစ်သည်။
“သူ့စခန်းက လူတွေအကုန်ပြန်ပို့ပြီးပြီဆိုတော့ ပိတ်လိုက်တာပေါ့။ တချို့ပြန်လို့ရတဲ့သူက ပြန်သွားတာပေါ့။ ပြန်လို့မရတဲ့သူကတော့ နယ်ခြားသောင်ရင်းမြစ် မြန်မာဘက်ခြမ်းနဲ့ ထိုင်းဘက်ခြမ်းမှာ ဆက်ရှိနေတာပေါ့။ သုံးထောင်လောက် ဆက်ရှိနေသေးတယ်” ဟု နယ်စပ်၌ နေထိုင်သူတစ်ဦးက ပြောသည်။
လတ်တလောတွင် တိုက်ပွဲများ ငြိမ်သက်နေ၍ ဒေသခံ အချို့မှာ နေရပ်သို့ ပြန်လည်နေထိုင်ကြသော်လည်း လေးကေ့ကော်မြို့သစ်နှင့် ထီးမယ်ဝါးခီးဒေသမှ ပြည်သူများမှာ မပြန်ရဲကြသေးဟု ဆိုသည်။
“ညှိနှိုင်းတာမျိုးတော့ ဘာမှ မကြားဘူး အခြေအနေက ဘာကြောင့်ငြိမ်လဲတော့ မသိဘူး အခုကတော့ ငြိမ်နေတယ်။ အဓိက ဖြစ်တဲ့ လေးကေ့ကော်တို့ ထီးမယ်ဝါးခီးတို့ ကလူတွေ ဘယ်ပြန်ရဲမလဲ။ သူတို့ ပြောတာက သူတို့ ပြန်ရင် အန္တရာယ် ရှိနိုင်တဲ့အတွက် သူတို့ မပြန်ဘူး”ဟု နယ်စပ်၌ နေထိုင်သူတစ်ဦးက ပြောသည်။
လေးကေ့ကော်ဒေသတိုက်ပွဲတွင် စစ်ကောင်စီတပ်က လေကြောင်းမှ တိုက်ခိုက်ခြင်း၊ လက်နက်ကြီးများ အလွန်အကျွံအသုံးပြုပစ်ခတ်ခြင်းများကြောင့် ဒေသခံ သောင်းနှင့်ချီ၍ စစ်ဘေးရှောင်ကြရပြီး ထိုင်းနိုင်ငံဘက်သို့ တိမ်းရှောင်သူ ထောင်နှင့်ချီရှိသည်ဟု ဆိုသည်။