အကြမ်းဖက်စစ်ကောင်စီတပ်အား တစ်ရက်တည်းတွင် နှစ်ကြိမ်တိုက်ခိုက်ခဲ့ကြောင်း မွန်ပြည်နယ်အခြေပြု တော်လှန်ရေးအဖွဲ့(MSRU)က ယနေ့(ဇန်နဝါရီ ၂၉) အသိပေးထုတ်ပြန် သည်။
တိုက်ခိုက်မှုများကို ယမန်နေ့(ဇန်နဝါရီ ၂၈)ည ၆နာရီခွဲတွင် တစ်ကြိမ်၊ ည ၁၀နာရီခန့်တွင် တစ်ကြိမ်ပြုလုပ်ခဲ့ပြီး စစ်ကောင်စီဘက်မှ ထိခိုက်မှုနှင့် ဒဏ်ရာပြင်းထန်မှုများရှိခဲ့သည်ဟု ထုတ်ပြန်ချက်တွင် ဖော်ပြသည်။
ပထမအကြိမ်တိုက်ခိုက်မှုကို ရေးမြို့နယ်အခြေစိုက်ခြေမြန်တပ်ရင်း- ခမရ(၅၈၆)အား စမ်းသပ်ထုတ်လုပ်ထားသော တာဝေးပစ် Mortar ဖြင့် နှစ်ကြိမ်ပစ်ခတ်ခဲ့ကြောင်း MSRUက ဖော်ပြထားသည်။
ထို့အပြင် ဒုတိယအကြိမ်တိုက်ခိုက်မှုကိုမူ ည ၁၀နာရီခန့်၌ ရန်ကုန်-ထားဝယ် အာရှလမ်းမကြီး ပေါ်သို့ မောင်းနှင်လာသော ခလရ(၃၄၃) တပ်ရင်းမှ ကင်းလှည့် စစ်ကားတစ်စီးအား Ye Special Task Force (YSTF)နှင့်ပူးပေါင်း၍ တိုက်ခိုက်ခဲ့ရာ စစ်ကောင်စီဘက်မှ ထိခိုက်ဒဏ် ရာရသူများရှိခဲ့သည်ဟု ထုတ်ပြန်ချက်က ဆိုသည်။
မွန်ပြည်နယ်အခြေပြုတော်လှန်ရေး အစည်းအရုံး (MSRU) နှင့် Ye Special Task Force (YSTF) ပူးပေါင်းအဖွဲ့မှ မိုင်းဆွဲတိုက်ခိုက်ခဲ့ပြီး နှစ်ဖက်အပြန်အလှန်ထိတွေ့ကာ တိုက်ပွဲငယ်ဖြစ်ပွားခဲ့ကြောင်းလည်း ပါရှိသည်။
ထို့နောက် စစ်ကောင်စီတပ် ခလရ (၃၄၃)တပ်ရင်းမှ လက်နက်ကြီးဖြင့် ရမ်းသမ်းပစ်ခတ် ခဲ့သော်လည်း မဟာမိတ်ပူးပေါင်းအဖွဲ့များ ထိခိုက်မှု တစ်စုံတစ်ရာ မရှိခဲ့ကြောင်း ထုတ်ပြန်ထားသည်။စစ်ကောင်စီတပ်မှထိ့ခိုက်သေဆုံးမှုရှိကြောင်းလည်းသိ့ရသည်။
“မွန်ပြည်နယ် အနေနဲ့ လှုပ်ရှားမှုတွေမှာ ဒေသခံ EAO ပါဝင်မှု မရှိတော့ မွန်ပြည်နယ် အနေနဲ့ ကျွန်တော်တို့ လုပ်ဆောင်တဲ့အခါ ကျွန်တော်တို့ သုညကနေ စ ရတာမျိုးတွေရှိတယ်။ ကျန်တဲ့ ချင်း ကရင် ကရင်နီ ကချင် ဒေသတွေလိုမျိုးမဟုတ်ပဲ ကျွန်တော်တို့က သုညကနေ ပြန်ဆောက်ရင်းနဲ့ တော်လှန်ရတဲ့အတွက် လုပ်ငန်းစဥ်တွေက ကြာမြင့်လာတာမျိုးရှိတယ် ခင်ဗျ”ဟု MSRUပြန်ကြားရေးတာဝန်ခံကပြောသည်
ယခုအကြိမ်အပါအဝင် မွန်ပြည်နယ်တွင် MSRU က အာဏာသိမ်းစစ်ကောင်စီပစ်မှတ်များကို လေးကြိမ် တိုက်ခိုက်ခဲ့ပြီးဖြစ်ကြောင်းလည်း ၎င်းကဆက်ပြောသည်။
MSRU နှင့် YSTF တို့ပူးပေါင်း၍အကြမ်းဖက်စစ်ကောင်စီတပ်ကို ဇန်နဝါရီ ၆ ရက်ကလည်း တိုက်ခိုက်ခဲ့သေးသည်ဟု MSRUက ထုတ်ပြန်ထားသည်။
ယင်းတိုက်ခိုက်မူတွင် ရေးမြို့နယ်အခြေစိုက် အမှတ် (၁၉) စစ်ဆင်ရေးကွပ်ကဲမှုဌာနချုပ် လက်အောက်ခံ အာယုတောင်ကျေးရွာ အနီးရှိ ခမရ (၃၄၃) တပ် ၏ စစ်ဆေးရေးဂိတ်ကို ဇန်နဝါရီ ၆ ရက် ည ၇နာရီခွဲခန့်တွင် ၄၀မမ ဗုံးပစ်လောင်ချာဖြင့်ပစ်ခတ်ခဲ့ ပြီး လက်ပစ်ဗုံး ဖြင့် နှစ်ကြိမ်ပစ်ခတ်တိုက်ခိုက်ခဲ့သည်။ ထိုနေ့မှာပင် ခမရ (၅၈၇) အတွင်းရှိ ကင်းပုန်းစစ်သားများကို လက်နက်ငယ်ဖြင့် လည်း ပစ်ခတ်ခဲ့သည်။ ထိုတိုက်ခိုက်မှုတွင် ကင်းပုန်းစစ်ကောင်စီတပ်သားနှစ်ဦးသေဆုံးခဲ့သည်ဟု ဒေသခံကာကွယ်ရေးတပ်များက ထုတ်ပြန်ထားသည်။