မြို့ခံဝန်ထမ်းများလည်း စစ်ကောင်စီလက်အောက် တာဝန်ထမ်းဆောင်ခြင်းမှ ရှောင်ရှားရန် သတိပေး
ကရင်ပြည်နယ် မူတြော်(ဖာပွန်)ခရိုင်အတွင်းရှိ စစ်ကောင်စီလက်အောက်တွင် တာဝန်ထမ်းဆောင်နေသော အရပ်ဘက်ဌာနဆိုင်ရာ အသီးသီးမှ ဝန်ထမ်းများ အားလုံး မိမိနေထိုင်ရာဒေသသို့ အတားအဆီးမဲ့ ရေလမ်းခရီးဖြင့် ဖာပွန်မြို့မှ သတ်မှတ်သည့် အချိန်နေ့ရက်အတွင်း ထွက်ခွာကြရန် ကရင်အမျိုးသားအစည်း အရုံး/ ကရင်အမျိုးသားလွတ်မြောက်ရေးတပ်မတော်(KNU/KNLA) တပ်မဟာ (၅) စစ်ရုံးချုပ်က ယနေ့ထုတ်ပြန်သည်။
ဇန်နဝါရီ ၂၉ရက်စွဲပါ စာကို တပ်မဟာ(၅)၏ မူတြော်သတင်းစဉ်က ယနေ့ထုတ်ပြန်ခဲ့ခြင်းဖြစ်ပြီး မြို့ခံဝန်ထမ်းများသည်လည်း စစ်ကောင်စီလက်အောက်ဌာနဆိုင်ရာတာဝန်များ ထမ်းဆောင်ခြင်းမှ ရှောင်ရှားကြရန် အသိပေးအကြောင်း ကြားအပ်သည်ဟု ဖော်ပြထားသည်။
လိုက်နာမှုမရှိဘဲ ပျက်ကွက်ပါက ထိရောက်စွာ အရေးယူဆောင်ရွက်သွားမည်ဖြစ်ကြောင်း သတိပေးခြင်းနှင့်အတူ အသိပေးအကြောင်းကြားအပ်ပါသည်ဟုလည်း ကြေညာချက်၌ ပါရှိသည်။
Public Service Announcement
ယခုကဲ့သို့ ထုတ်ပြန်ရခြင်းမှာ KNU/KNLA တပ်မဟာ(၅) နယ်မြေအတွင်းရှိ စစ်ကောင်စီ အုပ်ချုပ်ရေးယန္တရားများ မလည်ပတ်နိုင်စေရန်ဖြစ်သည်ဟု ဆိုသည်။
တပ်မဟာ(၅)သည် စစ်ကောင်စီတပ်ကို ခုခံတိုက်ခိုက်မှုများ လုပ်ဆောင်နေပြီး အဆိုပါနယ်မြေ၌ တိုက်ပွဲများနေ့စဉ်ဖြစ်ပွားကာ စစ်ကောင်စီတပ်ဖွဲ့ဝင်များသေဆုံးထိခိုက်မှုများပြားလျက်ရှိသည်။
