ကရင်အမျိုးသားအစည်းအရုံး(KNU) တပ်မဟာ (၅)နယ်မြေသို့ စစ်ကောင်စီတပ်က ယနေ့ နံနက်ပိုင်းတွင် ဗုံးကြဲတိုက်ခိုက်ခဲ့၍ အဆောက်အဦ အချို့ပျက်စီးခဲ့ကြောင်း KNU သတင်းရင်းမြစ်တစ်ဦးက ပြောသည်။
ဇန်နဝါရီ ၃၁ရက် နံနက် ၁နာရီခန့်တွင် ဖာပွန်ခရိုင် သေကော်ထာဒေသသို့ တိုက်လေယာဉ်ဖြင့် ဗုံးကြဲလာခြင်းဖြစ်သည်ဟု ဆိုသည်။
“ညကဖြစ်တာ ဒါပေမဲ့ ဒီမနက်လို့ ပြောလို့ရတာပေါ့။ မနက်ဘက်ကူးသွားပြီ။ သူတို့လာပစ်တာက ကျွန်တော်တို့ စခန်းပေါ့။ ကျွန်တော်တို့ KNDO တပ်ရင်း(၁) စခန်းတစ်ခုပေါ့။ အဲဒါကို လာပစ်တာ။ အဲဒီနေရာကို အရင်တစ်ခေါက်ကလည်းလာပစ်ဖူးတယ်”ဟု KNU သတင်းရင်းမြစ်က ပြောသည်။
လေကြောင်း တိုက်ခိုက်မှုကြောင့် လူထိခိုက်မှုမရှိသော် လည်း စာကြည့်တိုက်နှင့် အစည်းအဝေးလုပ်ရန် တည် ဆောက်ထားသည့် အဆောက်အဦး ပျက်စီးမှုဖြစ်ခဲ့သည်ဟု ပြောသည်။
Public Service Announcement
ဇန်နဝါရီ ၂၉ရက်ကလည်း ဖာပွန်ခရိုင် ဖာပွန် – ကမမောင်း လမ်းရှိ စစ်ကောင်စီတပ်စခန်းမှ လက်နက်ကြီးများဖြင့် ပစ်ခတ်ခဲ့၍ ဒေသခံကလေးငယ် အပါအဝင် နှစ်ဦးသေဆုံးပြီး ငါးဦးဒဏ်ရာရရှိခဲ့သည်။ နေအိမ်များ ပျက်စီးပြီး အိမ်မွေးတိရိစ္ဆာန်များလည်း သေဆုံးခဲ့သည်။
စစ်ကောင်စီတပ်သည် KNU တပ်မဟာ(၅)နယ်မြေသို့ ညသန်းခေါင်းယံအချိန် လေကြောင်းမှ တိုက်ခိုက်မှုများကို ယခင်ကလည်း အကြိမ်ကြိမ်ပြုလုပ်ခဲ့၍ အရပ်သားသေဆုံးထိခိုက်မှုရှိခဲ့သည်။
