မန္တလေးတိုင်း၊ မြင်းခြံမြို့တွင် ယနေ့နံနက်ပိုင်းကအာဏာသိမ်း စစ်ကောင်စီနှင့်ပူးပေါင်းနေသည့် ကမ္ဘောဇ-KBZ ဘဏ်ခွဲတစ်ခုမိုင်းခွဲခံရကြောင်း ဒေသခံများက ပြောသည်။
KBZ ဘဏ်သည် စစ်ကောင်စီနှင့်ပူးပေါင်း၍ ပြည်သူများ၏ ဘဏ်အကောင့်များကို သတင်းအချက် အလက် သက်သေမရှိဘဲ လက်လွတ်စပယ် Freeze လုပ်ခြင်း၊ ဖျက်သိမ်းခြင်းများ ပြုလုပ်နေလျက်ရှိကြောင်း၊ မိမိတို့ MGN Ranger အနေဖြင့် သတိပေးစာထုတ်ပြန်ပြီး ဖြစ်သော်လည်း ဆက်လက်လုပ်ဆောင်နေကြောင်း သိရှိရသဖြင့် ယနေ့နံနက် ၆ နာရီ ၁၅မိနစ် အချိန်တွင် မြင်းခြံမြို့ရှိ KBZ ဘဏ်ခွဲ ၃ အား မိုင်းတစ်လုံးခွဲ၍ ထပ်မံသတိပေးလိုက်ကြောင်း မြင်းခြံ MGN Ranger အဖွဲ့က သတင်းထုတ်ပြန်သည်။
“မြင်းခြံမှာ စစ်ကောင်စီ ထောက်တိုင်မှန်သမျှကို ရရာနေရာကနေ တိုက်ခိုက်ချေမှုန်းပစ်မှာပါဗျ။ ကျွန်တော်တို့ကတော့ စကစနဲ့ဆက်နွယ်တာ မှန်သမျှတော်လှန်ချေမှုန်းနေမှာပါ။”ဟု MGN Ranger အဖွဲ့တာဝန်ရှိသူက လူထုနွေဦးသို့ပြောသည်။
နောက်နောင်တွင်လည်း စစ်ကောင်စီနှင့်ပူးပေါင်းလုပ်ဆောင်သည့် မည်သူမဆို၊ မည်သည့်အဖွဲ့အစည်းမဆို စစ်ကောင်စီ၏ ထောက်တိုင်အဖြစ် သက်မှတ်ပြီး တိုက်ခိုက်ချေမှုန်းသွားမည်ဖြစ်ကြောင်း MGN Rangerက သတိပေးသည်။
Public Service Announcement
ATMစက် ၄ လုံးတွဲရှိသည့်အနက် ၂လုံးနှင့် ပတ်ချာလည်မှန်များ ကွဲသွားကြောင်း၊ ထိုစက်များအား မိုးကာများအုပ်ထားကြောင်း ဒေသခံတစ်ဦးက ပြောသည်။
မြင်းခြံမြို့နယ်သည် မန္တလေးတိုင်းတွင်အကြမ်းဖက်စစ်ကောင်စီအား ခုခံတော်လှန်နေသည့် အားအကောင်းဆုံးမြို့နယ်တစ်ခုဖြစ်ပြီး မိုဘိုင်းအင်တာနက်များလည်းဖြတ်တောက်ခံထားရသည်မှာ နှစ်ဝက်ခန့်ရှိနေပြီဖြစ်သည်။
ပြီးခဲ့သည့် ၂၀၂၁ ဧပြီ ၁၈ ရက်ကလည်း မြင်းခြံမြို့ ဗိုလ်ချုပ်လမ်းမပေါ်ရှိ KBZ ဘဏ် ပေါက်ကွဲမှုဖြစ်ပွားခဲ့သေးသည်။
