ရှမ်းပြည်နယ်အတွင်းရှိ နိုင်ငံရေးအင်အားစုများ၊ တိုင်းရင်းသားပြည်သူများ အားလုံးသည် တစ်စိတ်တစ်ဝမ်းတည်းဖြင့် စစ်အာဏာရှင်စနစ်ဆန့်ကျင်ရေး ပြည်သူ့ဘဝလွတ်မြောက်ရေးအတွက် စုစည်းလက်တွဲဆောင်ရွက်ကြပါရန် တိုက်တွန်းဖိတ်ခေါ်ကြောင်း အမျိုးသားညီညွတ်ရေးအစိုးရ(NUG) က (၇၅)နှစ်မြောက် ရှမ်းအမျိုးသားနေ့(ရှမ်းပြည်နယ်နေ့)သို့ သဝဏ်လွှာပေးပို့သည်။
ယခုအချိန်သည် စစ်အာဏာသိမ်းယူမှုကို အကြမ်းမဖက် ဆန့်ကျင်ကြသည့် နိုင်ငံသူ၊ နိုင်ငံသားများစွာအပေါ် အကြမ်းဖက်နှိမ်နင်းခြင်း၊ ရက်စက်စွာ ဖမ်းဆီးသတ်ဖြတ်ခြင်း၊ ပြည်သူများ ၏အသက်အိုးအိမ်ကို ဖျက်ဆီးခြင်း၊ တိုင်းရင်းသားနယ်မြေများတွင် အလွန်အကျွံစစ်အင်အားဖြင့် ထိုးစစ်ဆင်ခြင်းနှင့် ပြည်သူတို့၏ ဒီမိုကရေစီနှင့် လူ့အခွင့်အရေးများကို ပြောင်ပြောင်တင်းတင်းချိုးဖောက်ခြင်းအစရှိသည်တို့ကို စစ်ကောင်စီက နေ့စဉ်ရက်ဆက် ကျုးလွန်လျက်ရှိပြီးပြည်သူတစ်ရပ်လုံးက ရရာနည်းလမ်းများဖြင့်ခုခံတွန်းလှန်နေကြရချိန်ဖြစ်ကြောင်း ဖော်ပြထားသည်။
စစ်တပ်အာဏာသိမ်းပြီးနောက်ပိုင်း ကရင်၊ ကရင်နီ၊ ကချင်၊ ချင်းနှင့် ကိုးကန့် တိုင်းရင်းသားလက်နက်ကိုင် အဖွဲ့များအနေဖြင့် စစ်ကောင်စီတပ်ကို ခုခံတိုက်ခိုက်မှုများ လုပ်ဆောင်လျက်ရှိသည်။ ရှမ်းလက်နက်ကိုင် အဖွဲ့များဖြစ်သည့် ရှမ်းပြည်တိုးတက်ရေးပါတီ(SSPP)နှင့် ရှမ်းပြည်ပြန်လည်ထူထောင်ရေးကောင်စီ(RCSS) တို့အနေဖြင့် စစ်ကောင်စီတပ်ကို ခုခံတိုက်ခိုက်မှုများ ဆောင်ရွက်ခြင်းမရှိသေးဘဲ ၎င်းတို့ အချင်းချင်းကြား၌သာ တိုက်ပွဲများ ဖြစ်ပွားနေသည်။
