ဩစတြေးလျစီးပွားရေးပညာရှင် ရှောင်တာနဲလ်ကို စစ်​ကောင်စီက ပြန်လွှတ်မ​ပေးသေး

ဩစတြေးလျနိုင်ငံသား စီးပွားရေးပညာရှင်ရှောင်တာနဲလ်ကို ပြန်လွှတ်ပေးခြင်း မရှိသေး ကြောင်း အကြမ်းဖက်စစ်ကောင်စီပြောခွင့်ရ ဇော်မင်းထွန်းက စစ်​ကောင်စီထုတ်ပြန်​သောသတင်းများကိုအသား​ပေး​ဖော်ပြ​လေ့ရှိသည့် ပြည်တွင်းသတင်းဌာနအချို့ကို အတည်ပြုပြောသည်။

ကမ္ဘောဒီးယားဝန်ကြီးချုပ် ဟွန်ဆန်၏ ကြားဝင်ဆောင်ရွက်ပေးမှုအပြီး မြန်မာစစ်ကောင်စီက မစ္စတာရှောင်တာနဲလ်ကို ပြန်လွှတ်ပေးလိုက်ကြောင်း Khmer Times သတင်းဌာနက ယနေ့ (ဖေဖော်ဝါရီ ၇ ရက်) ဖော်ပြခဲ့သော်လည်း နာရီပိုင်း အကြာတွင် ပြန်လည်ဖြုတ်ချသွားသည်။

အကြမ်းဖက်စစ်ကောင်စီက မစ္စတာရှောင်တာနဲလ်ကို ဖမ်းဆီးထားသည်မှာ ဖေဖော်ဝါရီ ၆ ရက်တွင် တစ်နှစ်ပြည့်ခဲ့ပြီး ယင်းနှစ်ပတ်လည်နေ့တွင် ၎င်းကို ချက်ချင်းပြန်လွှတ်ပေးရန် ဩစတြေးလျနိုင်ငံခြားရေးဝန်ကြီးဌာနက ထုတ်ပြန်ခဲ့သည်။

သတင်းရင်းမြစ်အချို့၏အဆိုအရ မစ္စတာရှောင်တာနဲလ်ကို အကြမ်းဖက်စစ်ကောင်စီက လာမည့် ပြည်ထောင်စုနေ့(ဖေဖော်ဝါရီ ၁၂ ရက်)တွင် ပြန်လွှတ်ပေးနိုင်သည်ဟု သိရသည်။

Public Service Announcement

မစ္စတာရှောင်တာနဲလ်သည်နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၏ စီးပွားရေးအကြံပေးဟောင်းဖြစ်ပြီး ၎င်းကို ဖမ်းဆီးပြီးနောက် အစိုးရလျှို့ဝှက်ချက် ဥပဒေ ပုဒ်မဖြင့် အကြမ်းဖက်စစ်ကောင်စီက တရားစွဲဆိုခဲ့သည်။