အာဏာသိမ်းစစ်ကောင်စီရဲ့ ရွေးကောက်ပွဲကော်မရှင်ဟာ ရွေးကောက်ပွဲအနိုင်ရ အမျိုးသားဒီမိုကရေစီအဖွဲ့ချုပ် ပါတီကိုလာမယ့်ရက်သတ္တပတ်အတွင်း စစ်ဆေးမှုလုပ်မယ်လို့ ကြေညာလာပါတယ်။
စစ်တပ်အာဏာသိမ်းပြီးနောက် ရွေးကောက်ပွဲကော်မရှင်ကိုအသစ်ပြန်လည်ဖွဲ့စည်းကာ ပါတီတွေကို စစ်ကောင်စီက စစ်ဆေးခိုင်းနေတာပါ။
လက်ရှိအချိန်ထိ ပါတီ ၆၇ ပါတီကို စစ်ဆေးပြီးပြီလို့သိရပါတယ်။ စစ်ဆေးရာမှာပါတီဝင်အင်အား ၊ ပါတီရန်ပုံငွေကြေးတွေကိုစစ်ဆေးတာတွေ လုပ်တယ်လို့လည်းသိရပါတယ်။
စစ်ကောင်စီဟာ NLD ပါတီကို ဖျက်သိမ်းဖို့အတွက်အကြောင်းပြချက်ပေးကောင်းအောင် ပါတီတွေကို စစ်ဆေးဟန်ပြုတာလို့ နိုင်ငံရေးလေ့လာသူအချို့က မှတ်ချက်ပြုထားကြပါတယ်။
Public Service Announcement
တချိန်တည်းမှာပဲ စစ်ကောင်စီရဲ့ဝါဒဖြန့်မီဒီယာ မြဝတီက ထုတ်လွှင့်တဲ့ စစ်ကောင်စီလိုလားသူတွေရဲ့ စကားဝိုင်းတွေမှာ NLD ပါတီကို ဖျက်သိမ်းသင့်ကြောင်း ဆွေးနွေးတာတွေရှိနေပါတယ်။
စစ်တပ်ဟာ အာဏာသိမ်းပြီးတဲ့နောက် NLD ခေါင်းဆောင်ပိုင်းတွေ ၊အမတ်တွေ ၊ ဝန်းရံသူတွေကို ဖမ်းဆီးထောင်ချ တာတွေအပြင် ပါတီရုံးတွေကို ဝင်ရောက်ရှာဖွေတာတွေ ၊ ချိတ်ပိတ်တာတွေကိုအဆက်မပြတ်လုပ်ဆောင်ခဲ့တာပါ။
