ယင်းမာပင်မြို့နယ်ရှိ ရဲတပ်ရင်း (၂၈)ကို မဟာမိတ်တပ်​ပေါင်းစု တိုက်ခိုက်၊ စစ်​ကောင်စီရဲ ၁၄ဦး​သေဆုံး​ကြောင်း ထုတ်ပြန်

စစ်ကိုင်းတိုင်း၊ ယင်းမာပင်မြို့နယ်အတွင်းရှိ ရဲတပ်ရင်း (၂၈)ကို မဟာမိတ် တပ်ပေါင်းစုက မိုင်းခွဲတိုက်ခိုက်ရာ အကြမ်းဖက်စစ်ကောင်စီလက်ခံ ၁၄ ဦးသေဆုံးကြောင်း အမိမြေ -တော်လှန်ရေးတပ်ဖွဲ့က သတင်းထုတ်ပြန်သည်။

ယနေ့( ဖေဖော်ဝါရီ ၁၁ ရက်) နံနက် ၉နာရီမိနစ် ၄၀ခန့်က အမိမြေ တော်လှန်ရေးတပ်ဖွဲ့နှင့်အတူ ချိုမိုင်မိုင်တပ်ဖွဲ့၊ Regional Friend Fighters နှင့် ပြောက်ကျားရဲဘော်များ စုပေါင်း၍ စွန်ရဲစစ်ဆင်ရေးအဖြစ် သက်မှတ်ပြီး ယင်းမာပင်မြို့နယ်၊ ရွှေတောင်ဦးအနီးရှိ အောင်ဇေယျကုန်းနှင့် ရဲတပ်ရင်း ၂၈ ကြားကိုလည်းကောင်း၊ ရဲတပ်ရင်း ၂၈ အတွင်းကိုလည်းကောင်း၊ ပစ်မှတ်နှစ်ခုထား၍ မိုင်းစနစ်ဖြင့်တိုက်ခိုက်ခဲ့သည်။ အောင်ဇေယျကုန်းနှင့် ရဲတပ်ရင်း (၂၈) ကြား မိုင်းခွဲတိုက်ခိုက်မှုတွင် ရဲ ၁၀ ဦးခန့်သေဆုံးပြီး ထိခိုက်ဒဏ်ရာရသူ အများအပြားရှိကာ၊ ရဲတပ်ရင်းဂိတ်ဝမှထွက်လာသော ရဲများကိုတိုက်ခိုက်ရာ ရဲလေးယောက်ထပ်မံသေဆုံးကြောင်းသိရပြီး ပြ​ည်သူ့ရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း အမိမြေ တော်လှန်ရေးတပ်ဖွဲ့က အသိပေးသည်။

အဆိုပါတိုက်ခိုက်မှု​ကြောင့်စစ်ကောင်စီတပ်ဖွဲ့ဝင်များသည် တပ်ရင်း(၂၈)အနီး အောင်မိုးကျေးရွာတောပြင်ရှိ လူနေအိမ်၆လုံးကို မီးရှို့ဖျက်စီးသွားခဲ့ပြီး ရွာခံများလည်းထွက်ပြေးတိမ်းရှောင်နေရကြောင်း ဒေသခံအချို့က ပြောသည်။

ဇန်နဝါရီ ၃၁ရက် ညကလည်း အမိမြေတော်လှန်ရေးတပ်ဖွဲ့၊ ယင်းမာပင် PDF၊ မုံရွာခရိုင်တပ်ရင်း (၂)အထူးတပ်ဖွဲ့တို့ပူးပေါင်းကာ ရဲတပ်ရင်း ၂၈ သို့ အဝေးပစ်လက်နက်ကြီးများဖြင့် ပစ်ခတ်တိုက်ခိုက်ခဲ့ပြီး ထိခိုက်မှုများရှိခဲ့သည်။

Public Service Announcement