●လာမည့် နွေရာသီ လျှပ်စစ်မီး အကြီးအကျယ်ပျက်နိုင်
လာမည့်နွေရာသီတွင် လျှပ်စစ်မီးနှင့်ရေကို ပြည်သူများခြွေတာသုံးစေရေးအသိပညာပေးရန်အတွက် အကြမ်းဖက်စစ်ကောင်စီက ၎င်း၏လက်အောက်ခံဝန်ကြီးဌာန၅ ခုကို ဖေဖော်ဝါရီ ၁၂ ရက်တွင် တာဝန်ပေးလိုက်သည်။
ကမ္ဘာပေါ်တွင် ရေချိုရှားပါးလားခြင်းနှင့် ဓာတ်ငွေ့နှင့် စွမ်းအင်ဈေးကြီးမြင့်လာခြင်းကြောင့် ရေအားလျှပ်စစ်ကို ထုတ်ယူသုံးဆွဲလာခြင်းကြောင့် နွေရာသီတွင်လုံလောက်စွာအသုံးပြုနိုင်ရန်အတွက် ရေနှင့်လျှပ်စစ်ကိုချွေတာသုံးစွဲရန် ဖြစ်သည်ဟုစစ်ကောင်စီက အကြောင်းပြထားသည်။
ကာကွယ်ရေးဝန်ကြီးဌာန၊ ပြည်ကြားရေးဝန်ကြီးဌာန၊ စိုက်ပျိုးမွေးမြူရေးနှင့်ဆည်မြောင်ဝန်ကြီးဌာန၊ သမဝါယနှင့်ကျေးလက်ဝန်ကြီးဌာနနှင့် လျှပ်စစ်နှင့်စွမ်းအင်ဝန်ကြီးတို့ကထိုအတွက်ပညာပေးရမည်ဟု ဆိုသည်။
Public Service Announcement
အကြမ်းဖက်စစ်ကောင်စီလက်အောက်တွင် LNG(သဘာဝဓာတ်ငွေ့ရည်) သုံး ဓာတ်အားပေးစက်ရုံများကိုငွေမပေးနိုင်တော့သဖြင့် ရပ်တန့်သွားသည်။ထို့ကြောင့် ယခုနွေရာသီတွင် လျှပ်စစ်မီးကို ရေအားလျှပ်စစ်မှ ပိုမိုထုတ်ယူရန် စီစဉ်နေခြင်းဖြစ်သည်ဟု လျှပ်စစ်နှင့်စွမ်းအင်ဝန်ကြီးဌာနမှ အကြီးတန်းအရာရှိတစ်ဦးကပြောသည်။ LNGစီမံကိန်းများရပ်ဆိုင်းခြင်းကြောင့် ဓာတ်အား ၇၅၀ မဂ္ဂါဝပ်ထုတ်လုပ်မှုလျော့နည်းသွားကြောင်းစစ်ကောင်စီက ဆိုသည်။
“ဓာတ်ငွေ့နဲ့ ထုတ်တာတွေ အများစုက ရပ်နေတော့ ရေအားကို အားထားပြီးထုတ်မယ့်သဘော၊ ဒါပေ့မယ်လည်းနွေရာသီမှာရေကလည်းခမ်းတော့မှာမို့ လျှပ်စစ်မီးပြတ်မှု၊ မရှိအောင် အလှည့်ကျပေးမယ့်၊ပြည်သူကလည်းမလိုအပ်တာတွေမသုံးအောင် ဆောင်ရွက်ဖို့ သဘောပဲ”ဟု ၎င်းက ဆိုသည်။
မကြာခင်လည်း အလှည့်ကျ မီးပေးသည့် စနစ်ဖြင့် အချိန်ပိုင်းသာ မီးပေးနိုင်တော့မည်ဟုလည်း ၎င်းကဆက်ပြောသည်။ သို့သော် လက်တွေ့တွင် နွေရာသီမရောက်ခင်ဆောင်းရာသီကတည်းက လျှပ်စစ်မီးပျက်တောင်မှုများဆိုးရွားစွာဖြစ်နေပြီး အလှည့်ကျမီးပေးနေရပြီဖြစ်သည်။
“နေပြည်တော်က လွဲရင် အခြားမြို့တော့ အချိန်ပိုင်းဘဲ မီးပေးတော့မယ် သဘောပါ။ အရင်အစိုးရလက်ထက်က လျှပ်စစ်ဓာတ်အားပေးစက်ရုံတွေ အကုန်ရပ်ကုန်တာလဲ
ပါတယ်”ဟု အခြားအရာရှိတစ်ဦးက ပြောသည်။
နွေရာသီတွင် စိုက်ပျိုးရေပေးဝေမူများကို ရပ်တန့်မည်ဖြစ်၍ နွေရာသီသီးနှံစိုက်ပျိုးမှုများလည်း အခက်အခဲဖြစ်နိုင်သည်ဟု ၎င်းက သုံးသပ်ပြောသည်။
“စစ်တပ်အာဏာသိမ်းလိုက်တော့နွေရာသီမှာမီးမပျက်အောင် အရပ်သားအစိုးရကစီစဉ်ထားတဲ့ LNG ဓာတ်အားပေး စီမံကိန်းတွေ အကုန်ရပ်သွားတာပဲ။ ဒါကြောင့် ဒီနှစ်နွေက မီးပျက်တာ အကြီးအကျယ်ဖြစ်မယ်လို့ ပြောလို့ရတယ်”ဟု စွမ်းအင်ကုမ္ပဏီတစ်ခုမှ မန်နေးဂျင်းဒါရိုက်တာ တစ်ဦးက ပြောသည်။
အရပ်သားအစိုးရလက်ထက်တွင် ၂၀၁၈ ခုနှစ် ဇန်နဝါရီတွင် မဂ္ဂါဝပ် (၃၀၀၀) ခန့်ထွက်ရှိမည့် LNG စီမံကိန်း (၃)ခု နှင့် ၂၀၁၉တွင် မဂ္ဂဝါဝပ် ၉၀၀ထွက်ရှိမည့် LNG စီမံကိန်း ၃ ကို လုပ်ကိုင်ခွင့်စတင်ပေးခဲ့ပြီး ၃နှစ်အတွင်း လျှပ်စစ်ဓာတ်အားထုတ်ရန်စီစဉ်ခဲ့သည်။ထိုအပြင် ကာလတိုအတွင်းအမြန်မီးပေးနိုင်ရန် သဘာဝဓါတ်ငွေ့အရည် (LNG) ဖြင့် ဓာတ်အားထုတ်လုပ်မည့် သာကေတ ၄၀၀ မဂ္ဂါဝပ်နှင့် သန်လျင် ၃၅၀ မဂ္ဂါဝပ် ဓာတ်အားပေးစက်ရုံစီမံကိန်းများကို ၂၀၂၀ ဇွန်လတွင်စတင်လည်ပတ်ခဲ့သည်။ နွေရာသီတွင် မီးမပျက်စေရန် သဘာဝဓာတ်ငွေ့သုံး စီမံကိန်းငါးခုဖြစ်သည့် ကျွန်းချောင်း၊ အလုံ၊ ကျောက်ဖြူ၊ သန်လျင်နှင့်သာကေတတို့တွင် အရပ်သားအစိုးရက တည်ဆောက်ခဲ့ခြင်းဖြစ် သည်။
အာဏာသိမ်းခေါင်းဆောင် မင်းအောင်လှိုင်က အာဏာသိမ်းပြီးစတွင် လျှပ်စစ်ရထား၊ လျှပ်စစ်ကားများပြေးဆွဲရန်စီစဥ်မည်ဟုရောက်သည့်နေရာတိုင်းတွင်ပြောခဲ့သည်။သို့သော် ယခုနောက်ပိုင်းမီးပျက်လာပြီးနောက် လျှပ်စစ်ရထား၊လျှပ်စစ်ကားအကြောင်း မပြောတော့ပေ။
ထို့အပြင် အာဏာသိမ်းခေါင်းဆောင်သည် စစ်ကောင်စီတပ်သားများကိုလည်း ချိုးချန်ချွေတာကြရန် မကြာခဏပြောလေ့ရှိသော်လည်း ၎င်းကိုယ်တိုင်မှာကျပ် သိန်း ၈၆၃ကျော်တန် PATEK Philippe နာရီရီဝတ်ဆင်ပြီး သိန်းဆယ်ချီတန် အနွေးထည်များကို ဝတ်ဆင်လေ့ရှိသည်။၎င်း၏ဇနီးမှာလည်း သိန်းဆယ်ဂဏန်းမှ ရာဂဏန်းအထိ့ရှိသောလက်ကိုင်အိတ်များကိုသာကိုင်လေ့ရှိသည်။
စစ်တပ်အာဏာသိမ်းမှုကြောင့်တစ်နိုင်ငံလုံးစီးပွားရေးကျဆင်းနေသော်လည်း အာဏာသိမ်းခေါင်းဆောင်က ယနေ့ နေပြည်တော်တွင်ဗိုလ်ရှုသဘင်ကို ကျပ်ငွေ ၉ ဘီလီယံအကုန်အကျခံ၍ စစ်ကောင်စီဝန်ထမ်းများကို ၎င်းအားအလေးပြုခိုင်းသည့်နေတွင်ပင် ပြည်သူများကို လျှပ်စစ်မီးနှင့် ရေလျော့သုံးရန် ညွန့်ကြားခဲ့ခြင်းဖြစ်သည်။
