ပဲခူးတိုင်း၊ ပြည်မြို့နယ်ပြည်သူ့အုပ်ချုပ်ရေးအဖွဲ့ကို ပြင်ဆင်ဖွဲ့စည်းပြီးကြောင်း ယနေ့(ဖေဖော်ဝါရီ ၁၈ ရက်)ထုတ်ပြန်ကြေညာသည်။
ယခုကာလတွင် အများပြည်သူတို့၏ လုံခြုံရေး၊ တရားဥပဒေစိုးမိုးရေးတို့အား နည်းမျိုးစုံဖြင့် ခြိမ်းခြောက်အကျပ်ကိုင်နေသော အကြမ်းဖက်စစ်ကောင်စီ နှင့် ၎င်းတို့၏ နောက်လိုက်များရန်မှ ကာကွယ်ရန် ဖွဲ့စည်းခြင်းဖြစ်ကြောင်း ထုတ်ပြန်ချက်၌ ဖော်ပြသည်။
အဆိုပါ ပြည်မြို့နယ်ပြည်သူ့အုပ်ချုပ်ရေးအဖွဲ့ကို ပြည်သူရွေးချယ်တင်မြှောက်ခံ လွှတ်တော်ကိုယ်စားလှယ် ၃ ဦးက နာယကများအဖြစ်တာဝန်ယူကာ အုပ်ချုပ်ရေးအဖွဲ့ခေါင်းဆောင် ၁ ဦး၊ ဒုတိယခေါင်းဆောင် ၁ ဦးနှင့် သက်ဆိုင်ရာကဏ္ဍအလိုက် တာဝန်ခံ၁၀ဦး စုစုပေါင်း ၁၂ ဦးဖြင့် ဖွဲ့စည်းထားခြင်းဖြစ်သည်။
ပြည်သူလူထု၏ အသက်အိုးအိမ်စည်းစိမ်ကို စောင့် ရှောက်ရန် ပြည်သူ့အုပ်ချုပ် ရေးအစီအစဉ် အကောင်အထည်ဖော်ရန် အမျိုးသားညီညွတ်ရေးအစိုးရ(NUG) ကြားကာလဒေသန္တရ ပြည်သူ့ အုပ်ချုပ်ရေးဖော်ဆောင်မှု ဗဟိုကော်မတီက မူဝါဒများ ချမှတ်ထားသည်။
Public Service Announcement
နိုင်ငံတော်အချုပ်အခြာအာဏာကို အကြမ်းဖက်စစ်ကောင်စီက လက်နက် အားကိုး၍ အဓမ္မသိမ်းယူခဲ့သည်မှာ တစ်နှစ်ကျော်ကြာမြင့် ခဲ့ပြီဖြစ်သော်လည်း လက်ရှိအချိန်အထိ နိုင်ငံ၏ အုပ်ချုပ်ရေး ယန္တယားကို အပြည့်အ၀ ထိန်းချုပ် လည်ပတ်စေရန် စွမ်းဆောင်နိုင်ခြင်းမရှိပေ။
