တယ်လီနောမြန်မာကို အကြမ်းဖက်စစ်ကောင်စီဩဇာခံကုမ္ပဏီထံ ရောင်းချမှုရပ်တန့်ရေး နည်းလမ်းများကို အမြန်ဆုံးအကောင်အထည်ဖော်ရန် နော်ဝေးလွှတ်တော်အမတ်များနှင့် အမျိုးသားညီညွတ်ရေးအစိုးရ (NUG)တို့ ယမန်နေ့(ဖေဖော်ဝါရီ ၁၈)တွင် သဘောတူ ဆုံးဖြတ်ခဲ့သည်။
တယ်လီနောမြန်မာကို အကြမ်းဖက်စစ်ကောင်စီနှင့် နီးစပ်သည့် Investcom လုပ်ငန်းစုထံ ရောင်းချမည့်ကိစ္စကို တားဆီးနိုင်ရေးအတွက် NUG ဆက်သွယ်ရေး၊ သတင်းအချက်အလက်နှင့် နည်းပညာဝန်ကြီး ဦးထင်လင်းအောင် ခေါင်းဆောင်သော မြန်မာကိုယ်စားလှယ်အဖွဲ့နှင့် နော်ဝေးလွှတ်တော်အမတ် ၃ ဦးတို့က အွန်လိုင်းဆွေးနွေးပွဲ ပြုလုပ်ခဲ့ခြင်း ဖြစ်ကြောင်း NUG ကိုယ်စားလှယ်ရုံး-နော်ဝေးက ထုတ်ပြန်သည်။
မြန်မာနိုင်ငံတွင် တယ်လီနောမြန်မာသုံးစွဲသူ ၁၈ သန်းကျော်ရှိပြီး ယင်းသည် နိုင်ငံ့လူဦးရေ၏ ၃ ပုံ ၁ ပုံဖြစ်ကြောင်းနှင့် တယ်လီနောမြန်မာကို Investcom ထံ ရောင်းချလိုက်ပါက ၁၈ သန်းကျော်သော မြန်မာပြည်သူများ၏ အချက်အလက်များက အကြမ်းဖက်စစ်ကောင်စီ လက်ထဲ ရောက်ရှိသွား မည်ဖြစ်ကြောင်း NUG ဝန်ကြီး ဦးထင်လင်းအောင်က ဆွေးနွေးသည်။
ယင်းသို့ ရောက်ရှိခြင်းသည် သုံးစွဲသူများ၏ လုံခြုံရေးကို ထိခိုက်နိုင်ပြီး အသက်အန္တရာယ်ပင် ရှိ ကြောင်းနှင့် တယ်လီနောမြန်မာရောင်းချမှုကို ရပ်ဆိုင်းထားရန် NUG အစိုးရက တောင်းဆို ကြောင်း ဦးထင်လင်းအောင်က ဆက်ပြောသည်။
Public Service Announcement
နော်ဝေးလွှတ်တော်အမတ်များကလည်း NUG ၏ သဘောထားနှင့်အတူတူ ဖြစ်ပြီး ရောင်းချမှု အထမမြောက်စေရန် NUG နှင့် ပူးပေါင်းဆောင်ရွက်မည်ဟု ဆိုသည်။
ပြီးခဲ့သည့် ဖေဖော်ဝါရီ ၁၆ ရက်တွင် နော်ဝေးပါလီမန်၌ တယ်လီနောမြန်မာ ရောင်းချမှုအခြေ အနေကို လွှတ်တော်အမတ် Mr. Ola Elvestuen က မေးမြန်းခဲ့ပြီး NUG နှင့် ယမန်နေ့ဆွေး နွေးပွဲတွင် အဆိုပါ လွှတ်တော်အမတ် တက်ရောက်ခဲ့သည်။
နော်ဝေးပါလီမန်၌ Mr. Ola Elvestuen ၏ မေးမြန်မှုကို စက်မှုဝန်ကြီးက နော်ဝေးအစိုးရ အနေဖြင့် တယ်လီနောမြန်မာကို စစ်အာဏာရှင်များသို့ရောင်းချရာတွင် သုံးစွဲသူများ၏ အချက်အလက်များကို လွှဲပြောင်းမှုကို တားဆီးနိုင်မည်မဟုတ်ကြောင်း ပြန်လည်ဖြေကြား ခဲ့သည်။
သို့ရာတွင် တယ်လီနောမြန်မာသုံးစွဲသူများနှင့် လူ့အခွင့်အရေး တက်ကြွလှုပ်ရှား သူများက တယ်လီနောကို အကြမ်းဖက်စစ်ကောင်စီထံရောင်းချမည့်ကိစ္စကို အပြင်းအထန်ကန့် ကွက်နေကြ ပြီး ရောင်းချမည့်အစီအစဉ်ဖျက်သိမ်းရန် လက်မှတ်ရေးထိုးတောင်းဆိုမှုများ လုပ်ဆောင်နေကြသည်။
