စစ်ကိုင်းတိုင်း ကနီမြို့နယ်တွင် အကြမ်းဖက်စစ်ကောင်စီတပ်ဝင်ရောက်လာ၍ ထွက်ပြေးသည့်ပြည်သူများအား စစ်တပ်ကလိုက်လံပစ်ခတ်ရာ အမျိုးသားတစ်ဦးသေဆုံးသွားကြောင်း ဒေသခံများက ပြောသည်။
အကြမ်းဖက်စစ်ကောင်စီတပ်သည် ယမန်နေ့ (ဖေဖော်ဝါရီ၁၉ ရက်)နံနက် ၁၁နာရီဝန်းကျင်က ကနီမြို့နယ်၊ ချိုင်ကျေးရွာသို့ ချင်းတွင်းမြစ်အရှေ့ဘက်ကမ်းမှ ဝင်ရောက်လာခဲ့ကြောင်း၊ ရွာသူရွာသားများသည် စစ်ကောင်စီတပ်သားများ ချင်းတွင်းမြစ်ကို ဖြတ်သန်းလာချိန် ထွက်ပြေးတိမ်းရှောင်ခဲ့ကြပြီး ရွာတွင်နောက်ဆုံးကျန်နေသည့် ကိုဇော်ခိုင်ဝင်းဆိုသူကို သေနတ်ဖြင့် ပစ်ခတ်သတ်ဖြတ်ခဲ့ခြင်းဖြစ်ကြောင်း၊ သေဆုံးသူသည် အသက်၄၀ ဝန်းကျင်ခန့်ရှိပြီး ရင်ဘက်ကျည်ထိမှန်သေဆုံးခဲ့ခြင်းဖြစ်ကြောင်း ဒေသခံများက ပြောသည်။
“အလောင်းကို စစ်ကောင်စီတွေထွက်သွားတဲ့အချိန်ကျမှ ကောက်ယူခဲ့ရတာ”ဟု ဒေသခံတစ်ဦးက ပြောသည်။
အကြမ်းဖက် စစ်ကောင်စီတပ်သည် ချိုင်ကျေးရွာရှိ ဘုန်းတော်ကြီးကျောင်းတွင် စခန်းချခဲ့ပြီး ကျေးရွာအတွင်းကဈေးဆိုင်အိမ်များနှင့် အောင်သရဖူ စာသင်ဝိုင်းနေအိမ်ရှိ ပစ္စည်းများအား သိမ်းဆည်းယူဆောင်သွားကြောင်း ဒေသခံများက ပြောသည်။
Public Service Announcement
အကြမ်းဖက်စစ်ကောင်စီတပ်သည်ယနေ့(ဖေဖော်ဝါရီ၂၀ရက်နေ့)တွင် ချိုင်ကျေးရွာမှထွက်ခွာသွားခဲ့ပြီး အိုင်ထောင်ကျေးရွာသို့ရောက်ရှိနေကာ ကျေးရွာဘုန်းတော်ကြီးကျောင်းနှင့် စာသင်ကျောင်းတွင် တပ်ဆွဲထားပြီး ကျေးရွာအတွင်းက ပြည်သူများ၏အခြေခံစားသောက်ကုန်များအား ယူဆောင်ကာချက်ပြုတ်စားနေကြောင်း ဒေသခံတစ်ဦးက ပြောသည်။
ဖေဖော်ဝါရီ၁၈ရက်နေ့ည ၈နာရီ ၂၀ ခန့်ကလည်းအကြမ်းဖက်စစ်ကောင်စီတပ်၏ ပစ်ခတ်မှုကြောင့် ချိုင်ကျေးရွာရှိ လူနေအိမ်တစ်လုံး မီးလောင်ပျက်စီးခဲ့သည်။
