ရန်ကုန်မြို့ ဒဂုံမြို့သစ်မြောက်ပိုင်း ရဲစခန်း၌ ယနေ့ညပိုင်းက ဗုံးပေါက်ကွဲမှုလေးကြိမ်ဖြစ်ခဲ့ကြောင်း အဆိုပါရဲစခန်းအနီးနေထိုင်သူများက လူထုနွေဦးသို့ ပြောသည်။
ယနေ့(ဖေဖော်ဝါရီ ၂၁ရက်)ည ၈နာရီခန့်ကစ၍ ဗုံးပေါက်ကွဲမှူ စတင်ဖြစ်ပွားခဲ့ကာ တစ်ကြိမ်လျှင် ၁၀ မိနစ် မှ၁၅မိနစ်ခန့်သာကွာ၍ ပေါက်ကွဲခဲ့သည်ဟု ဆိုသည်။
“ပထမ နှစ်ကြိမ်က အိမ်ပါတုန်ပြီးခါသွားတာ။ ဒုတိယမြောက် ပေါက်တဲ့အချိန် ရဲစခန်းထဲက သေနတ်နဲ့ ပစ်တာ ၁၀ချက်လောက်ရှိတယ်။တဖောင်းဖောင်းနဲ့ “ဟု အခင်းဖြစ် ရဲစခန်းပတ်ဝန်းကျင်တွင် နေထိုင်သူတစ်ဦးက ပြောသည်။
ထို့အပြင် ည ၈ နာရီခွဲခန့်က ရဲစခန်းလမ်းအတွင်းသို့ အရေးပေါ်လူနာတင်ယာဥ်တစ်စီး ဝင်ရောက်လာသည့်အသံများကြားရသည်ဟုလည်း သိရသည်ဟု ဆိုသည်။
Public Service Announcement
“သုံးကြိမ်မြောက် ပေါက်ပြီးတဲ့အချိန် ၇/၈ လမ်းဆုံ ဘက်ကနေ ရဲစခန်းလမ်းထဲဝင်လာတာပဲ။ဘယ်သူ ထိတယ်ဆိုတာတော့ မသိရသေးဘူး။ ဘယ်သူမှ ထွက်မကြည့်ရဲသေးဘူးလေ”ဟု ၇/၈ လမ်းဆုံအနီးနေထိုင်သူအမျိုးသားတစ်ဦးက ရှင်းပြသည်။
ထို့နောက် ည ၉နာရီကစ၍ ၇/၈လမ်းဆုံကို အကြမ်းဖက်စစ်ကောင်စီတပ်က ပိတ်ဆို့ကာ စစ်ဆေးမှုများပြုလုပ်နေပြီး အရပ်ဝတ်လက်နက်ကိုင်အချို့ပါ ရှိနေသည်ဟုလည်း မျက်မြင်တွေ့ရှိသူများက ပြောသည်။
ဖေဖော်ဝါရီ ၁၉ရက်ကလည်း မြောက်ဒဂုံမြို့နယ် ထားဝယ်ချောင်ရဲစခန်းကို ဗုံးပစ်ကာ စစ်ကူလာသည့်ကားပါ ထပ်မံတိုက်ခိုက်ခဲ့၍ စစ်ကောင်စီတပ်သား ၁၀ ဦးခန့် သေဆုံးနိုင်ကြောင်း စစ်ဆင်ရေးအဖွဲ့များက ထုတ်ပြန်ခဲ့သည်။
အဆိုပါ စစ်ဆင်ရေးကို People’s Force (Yangon) အဖွဲ့နှင့် Spring Brothers Force အဖွဲ့တို့ပူးပေါင်း လုပ်ဆောင်ခဲ့ခြင်းဖြစ်ပြီး အဝေးထိန်းမိုင်းနှင့်၄၀(မမ)ဗုံးသီးများအသုံးပြုခဲ့သည်ဟု အသိပေးထားသည်။
