ကျင်​ဒွေးသို့ စစ်​ကြောင်းထိုး​သောတပ်ကို ​ဒေသခံတပ်များက သုံးရက်ဆက်တိုက်ခိုက် စစ်​ကောင်စီတပ်သား ၂၁ဦး​သေ

မကွေးတိုင်း လောင်းရှည်မှ ကျင်ဒွေးမြို့သို့စစ်ကြောင်းထိုးလာသည့် အကြမ်းဖက်စစ်ကောင်စီတပ်နှင့် ဒေသခံကာကွယ်ရေးတပ်တို့ကြား သုံးရက်ကြာတိုက်ပွဲဖြစ်ပွားပြီး အကြမ်းဖက်စစ်ကောင်စီတပ်သား ၂၁ ဦးသေဆုံးခဲ့သည်ဟု ချင်းပြည်ကာကွယ်ရေးတပ်-CDF(ကန်ပက်လက်)က ယ​နေ့ညတွင် သတင်းထုတ်ပြန်သည်။

အကြမ်းဖက်စစ်ကောင်စီတပ်နှင့် ဒေသခံကာကွယ်ရေးတပ်များဖြစ်သောချင်း​ဒေသကာကွယ်​ရေးတပ်-CDF (ကန်ပက်လက်)၊PDF (​ဆော)၊ CNA ၊CDF(Daai)ပူး​ပေါင်းအဖွဲ့တို့ ကြား ဖေဖော်ဝါရီ ၂၀ရက်မှ ၂၂ ရက်အတွင်း တိုက်ပွဲလေးကြိမ်ဖြစ်ပွားပြီး အကြမ်းဖက်စစ်ကောင်စီတပ်သား ၂၁ သေဆုံးခဲ့သော်လည်း ဒေသခံကာကွယ်ရေးတပ်များဘက်မှ အထိအခိုက်မရှိခဲ့ဟု ထုတ်ပြန်ချက်တွင်​ ဖော်ပြထားသည်။

ဖေဖော်ဝါရီလ ၂၀ရက်နေ့တွင်မကွေးတိုင်း လောင်းရှည်မှ ကျင်ဒွေးမြို့သို့ဦးတည် စစ်ကြောင်းထိုးလာသော စစ်ကောင်စီစစ်ကြောင်းအား ဆွဲလွဲကျင်ရွာအနီး၌ နံနက် ၈နာရီ တွင်တစ်ကြိမ် နေ့လည် ၁၂ နာရီတွင်တစ်ကြိမ်CDF(ကန်ပက်လက်) ၊ CNAတို့မှ စောင့်ကြိုတိုက်ခိုက်ခဲ့ရာစစ်ကောင်စီဘက်မှ ၆ ဦးသေဆုံးခဲ့သည်။

ထို့အပြင်ဖေဖော်ဝါရီ ၂၁ ရက်တွင်လည်း CDF(ကန်ပက်လက်) ၊CNA ၊PDF(​ဆော)တို့က အကြမ်းဖက်စစ်ကောင်စီစစ်ကြောင်းကို ပူးပေါင်းတိုက်ခိုက်ခဲ့ရာ စစ်ကောင်စီ လေးဦး သေဆုံးခဲ့သည်။

Public Service Announcement

ယ​နေ့(ဖေဖော်ဝါရီ ၂၂ ရက်)တွင် ရေရှောင်လမ်းမြက်ခင်းတွင် စစ်​ကောင်စီတပ်ကို CDF-Daai၊ PDF(​ဆော)၊ CNAနှင့် CDF(ကန်ပက်လက်)တို့က တိုက်ခိုက်ခဲ့ရာ စစ်ကောင်စီတပ်သား ၁၁ ဦးထပ်မံသေဆုံးပြီးအများအပြားဒဏ်ရာရရှိခဲ့​ကြောင်းထုတ်ပြန်ချက်တွင်ပါရှိသည်။

တိုက်ပွဲတွင်အထိနာသောစစ်ကောင်စီတပ်သားများသည် မဆာတွီကျေးရွာရှိပြည်သူနေအိမ်များကို ဖောက်ထွင်းပြီး ပစ္စည်းများခိုးယူသွားပြီး၊ မောချောင်းရွာတွင် လူနေအိမ် လေးလုံးကိုမီးရှို့ဖျက်ဆီးခဲ့သည်။ ကျန်အိမ်များကိုလည်း ဖောက်ထွင်းပြီး အဖိုးတန်ပစ္စည်းများခိုးယူသွားသည်ဟုလည်း​ဖော်ပြထားသည်။

ထိုသို့ သုံးရက်ဆက်တိုက် တိုက်ပွဲပြင်းထန်ခြင်းကြောင့် ကျည်ဆံများ လိုအပ်ပါသောကြောင့် လှူဒါန်းပေးရန် CDF(ကန်ပက်လက်)ကတိုက်တွန်းထားသည်။