–ယနေ့ညနေတွင် မြို့ပြပြောက်ကျားအဖွဲ့တစ်ခု၏ နေရာအား ဝင်စီးခံရပြီး ရဲဘော်တစ်ဦးကျဆုံး
ရန်ကုန်မြို့ရှိ သပိတ်အင်အားစုနှင့် မြို့ပြပြောက်ကျား တပ်ဖွဲ့ဝင်များကို အကြမ်းဖက်စစ်ကောင်စီက ပိုက်စိပ်တိုက် ဖမ်းဆီးနေကြောင်း ဗမာ့လူငယ်ကွန်ရက်က ယနေ့(ဖေဖော်ဝါရီည၂၅ ရက်) ညပိုင်းတွင် သတိပေးထုတ်ပြန်သည်။
“လူငယ်တွေ၊UG တွေကို ပိုက်စိပ်တိုက် ဖမ်းဆီးလျှက်ရှိပါတယ်။ပြည်သူလူထုကြီးကို အထူးတိုက်တွန်းလိုတာက မိမိတို့အားလုံး လွတ်မြောက်ရေးအတွက် တော်လှန်ပေးနေတဲ့ ကျွန်တော်တို့ ရဲဘော်တွေကို ဝန်းရံပေးကြပါ”ဟု ဗမာ့လူငယ်ကွန်ရက်က ပြောသည်။
ထို့အပြင် ခိုလှုံစရာနှင့် နေစရာများတောင်းခံလာပါကလည်း ကူညီပေးကြရန်လည်း တိုက်တွန်းသည်။
“အစာရေစာ တောင်းခံလာခဲ့ရင် ကျွေးမွေးပေးကြပါ။အသက်တောင် ပဓာနမထားဘဲ တိုက်ယူနေကြတဲ့လူငယ်တွေပါဗျာ။ ပြည်သူကစောင့်ရှောက်မှ လုံခြုံမှာပါ”ဟု ထို အဖွဲ့က အသိပေးသည်။
ထို့အပြင် ယနေ့ည ၆ နာရီတွင် မြို့ပြပြောက်ကျားအဖွဲ့တစ်ခု၏ နေရာအား သတင်းပေးဒလန်ကြောင့် အကြမ်းဖက်စစ်ကောင်စီတပ်က ဝင်ရောက်စီးနင်းရာ UG ရဲဘော်တစ်ဦး ကျဆုံးခဲ့ကြောင်း Little Heros အဖွဲ့က ဆိုသည်။
“မရမ်းကုန်း ၃ ရပ်ကွက်မှာပါ။UGအဖွဲ့က ၁ယောက်သေဆုံး၊ ၂ယောက်ထိပါတယ်။ လူနာတင်ယာဥ်နဲ့လာသယ်သွားပါပြီ။ အပစ်လည်းရပ်သွားတယ်။အောင်သိဒ္ဓိလမ်းနဲ့တော်ဝင်မီးပွိုင့်ဘက်လမ်းတွေကို အကုန်ပိတ်လိုက်ပါပြီ ။စခ အင်အားများပါတယ်။ကလေးတွေကိုဘယ်လိုကူညီနိုင်မလဲစဥ်းစားပေးကြပါအုံး”ဟု ၎င်းက အဖွဲ့က ပြောသည်။
ရန်ကုန်မြို့ပြပြောက်ကျားအဖွဲ့များသည် ယခု ရက်သတ္တပတ်အတွင်း အကြမ်းဖက်စစ်ကောင်စီတပ်၏ နေရာ အများစုကို တိုက်ခိုက်ထားသည်။