ယူကရိန်းအပေါ် ရုရှား၏ ကျူးကျော်စစ်ကို NUG ရှုတ်ချ၊ ယူကရိန်းပြည်သူများနှင့် ရပ်တည်ကြောင်းထုတ်ပြန်

ရုရှားက ယူကရိန်းအပေါ် ကျူးကျော်စစ်ဆင်နွှဲခြင်းကို ရှုတ်ချကြောင်းနှင့် ယူကရိန်းပြည်သူများနှင့် ရပ်တည်ကြောင်း အမျိုးသားညီညွတ်ရေးအစိုးရ(NUG) နိုင်ငံခြားရေးဝန်ကြီးဌာနက ဖော်ပြသည်။

ယူကရိန်းနှင့် ၎င်း၏ ပြည်သူများအပေါ် ဆင်နွှဲလာသည့် စစ်ပွဲကို ရှုတ်ချပြီး ရုရှား၏လုပ်ရပ်များသည် ကုလ သမဂ္ဂ ပဋိညာဉ်စာတမ်းနှင့် နိုင်ငံတကာဥပဒေများကို ထင်ရှားစွာချိုးဖောက်ခြင်းဖြစ်ကြောင်း NUG က ဆိုသည်။

ယူကရိန်းအပေါ် ကြောက်မက်ဖွယ်ရာ ပြင်းထန်သော တိုက်ခိုက်မှုများကို ရုရှားက လေကြောင်း၊ ကုန်းမြေနှင့် ရေကြောင်းတို့မှ လုပ်ဆောင်နေပြီး ယင်းတိုက်ခိုက်မှုများကြောင့် အသက်ဆုံးရှုံးမှုများနှင့် ထောင်နှင့်ချီသော အရပ်သားများကို ၎င်းတို့၏ နေအိမ်များမှ စွန့်ခွာစေခဲ့ပြီဖြစ်သည်။

ရုရှားအနေဖြင့် ယူကရိန်း၏ နယ်နမိတ်တည်တံ့ခိုင်မြဲမှု၊ လွတ်လပ်မှုနှင့် အချုပ်အခြာအာဏာတို့ကို လေးစားရန် NUG က တောင်းဆိုသည်။

Public Service Announcement

ယူကရိန်းအပေါ် ရုရှား၏ ကျူးကျော်စစ်ကို အင်အားကြီးဒီမိုကရေစီနိုင်ငံများစွာက ပြစ်တင်ရှုတ်ချထားပြီး ရုရှားကို ပိတ်ဆို့ဒဏ်ခတ်မှုများလည်း ချမှတ်ကြသည်။

အကြမ်းဖက်မြန်မာစစ်ကောင်စီက ရုရှား၏ ကျူးကျော် စစ်ကို ထောက်ခံကြောင်း ပြောကြားထားသည်ကို တွေ့ရသည်။