▪️KDFမှ ရဲဘော်တစ်ဦးကျဆုံး
ကယား(ကရင်နီ)ပြည်နယ် နမ့်မယ်ခုံမြို့ သာယပ်ရွာတိုက်ပွဲအတွင်း အကြမ်းဖက်စစ်ကောင်စီတပ်သား ၂၀ ကျော်သေဆုံးကြောင်း ကရင်နီဒီမိုကရက်တစ်တပ်ဦး (KDF)က ထုတ်ပြန်သည်။
ယနေ့(ဖေဖော်ဝါရီ၂၅ရက်)နံနက် ၁၀နာရီမှစ၍ သာယပ်ရွာတိုက်ပွဲအတွင်း ကရင်နီဒီမိုကရက်တစ်တပ်ဦး (KDF) ၊ လွိုင်ကော် PDF ၊ DMO PDF ၊ ကရင်နီအမျိုးသားများကာကွယ်ရေးတပ်(KNDF)မဟာမိတ်တပ်ပေါင်းစုတို့ ပူးပေါင်း တိုက်ခိုက်ခဲ့ခြင်းဖြစ်သည်။
တိုက်ပွဲသည် တစ်နေကုန်နီးပါး ကြာမြင့်ခဲ့သည်အထိပြင်းထန်ခဲ့ကာ တိုက်ပွဲအတွင်း အကြမ်းဖက်စစ်ကောင်စီတပ်များမှ ၂၀ကျော် သေဆုံးနိုင်ပြီး တိုက်ပွဲတွင်း KDF မှ ရဲဘော်တစ်ဦး ကျဆုံးပြီးသုံးဦး မစိုးရိမ်ဒဏ်ရာများရရှိခဲ့သည်ဟု ဆိုသည်။
Public Service Announcement
တိုက်ပွဲတွင်း ကျဆုံးသွားသော ရဲဘော်စောဒေးဗစ်ထူး (ခ)လော်အယ်အား နိုင်ငံ့အာဇာနည်သူရဲကောင်းအဖြစ် အသိအမှတ်ပြုရင်း မှတ်တမ်းတင် ဂုဏ်ပြုကြောင်း KDFက ဖော်ပြသည်။
ကရင်နီ ပြည်နယ်(ဖယ်ခုံ၊မိုးဗြဲဒေသများအပါအဝင်) ဦးတည်၍ ဖေဖော်ဝါရီ ၁၆ရက်က စတင်ခဲ့သည့် အကြမ်းဖက်စစ်ကောင်စီ၏ ထိုးစစ်ဆင်မှုမှာ ၁၀ရက်တာ ကြာမြင့်နေပြီ ဖြစ်သည်။
တိုက်ပွဲများအတွင်း အကြမ်းဖက်စစ်ကောင်စီတပ်မှ သေဆုံး အထိအခိုက်များပြားသဖြင့် လေကြောင်းပစ်ကူများ နှင့် လက်နက်ကြီးပစ်ကူများ ရယူထားသည်။
ရှေ့ရက်များက တိုက်ပွဲများတွင် အကြမ်းဖက်စစ်တပ်မှ တပ်သား ၁၀၀ ကျော် သေဆုံးခဲ့ပြီး ပြည်သူ့ကာကွယ်ရေးတပ်ဖွဲ့ဝင်များဘက်မှလည်း ၃၀ ခန့်ကျဆုံးခဲ့ရသည်။
