ရှမ်းပြည်နယ်တောင်ပိုင်း မိုးဗြဲမြို့ ပွဲကုန်း(၁)ရပ်ကွက်မှ အသက်မပြည့်သေးသည့် ကလေးငယ်နှစ်ဦးအား အကြမ်းဖက်စစ်ကောင်စီက ရက်စက်စွာသတ်ဖြတ်ခဲ့သည့် ရုပ်အလောင်းအား တွေ့ရှိခဲ့သည်ဟု မိုးဗြဲပြည်သူ့ကာကွယ်ရေးတပ်က အသိပေးထုတ်ပြန်သည်။
မတ်လ ၆ရက်နံနက်ပိုင်းက မိုးဗြဲမြို့၊ ပွဲကုန်း (၁) ရပ်ကွက်နေ မောင်သြဂစတင်း (အသက် ၁၇နှစ်) နှင့် မောင်လားစရု(အသက်၁၀ နှစ်)တို့အား နေအိမ်၌ ဝင်ရောက်ဖမ်းဆီးခေါ်ဆောင်သွားခဲ့သည်။
ထို့နောက် ယနေ့ (မတ်လ ၉ ရက်) နေ့လယ်ပိုင်းတွင် မိုးဗြဲမြို့၊ ဝါရီဆူးပလိုင်ကျေးရွာ၌ သေဆုံးနေသည့် ရုပ်လောင်းသာ ပြန်လည်တွေ့ရှိခဲ့ကြောင်း မိုးဗြဲပြည်သူ့ကာကွယ်ရေးတပ်က ဆိုသည်။
ထို့ကြောင့် မိုးဗြဲပြည်သူများအနေဖြင့် မိမိတို့နေထိုင်ရာ ကျေးရွာ၊ရပ်ကွက်အတွင်း အကြမ်းဖက်စစ်ကောင်စီများရောက်ရှိလာမည်ဆိုပါက အချင်းချင်းအပြန်အလှန်သတင်းပေးကာ အတတ်နိုင်ဆုံး ရှောင်ထွက်ပေးရန် အသိပေးသည်။
Public Service Announcement
အသက်မပြည့်သည့်ကလေးငယ်များနှင့် အပြစ်မဲ့ပြည်သူများကို ရက်စက်စွာသတ်ဖြတ်နေသည့် အကြမ်းဖက်စစ်ကောင်စီရဲ့လုပ်ရပ်အား မိုးဗြဲပြည်သူ့ကာကွယ်ရေးတပ်မတော်အနေဖြင့် ပြင်းထန်စွာ ပြန်လည်ခုခံတော်လှန် သွားမည်ဟု ပြည်သူ့တပ်ဖွဲ့က ကတိပြုထားသည်။
ယမန်နေ့(မတ်လ ၈ရက်)ကလည်း အကြမ်းဖက်စစ်ကောင်စီ၏ လက်နက်ကြီးအသုံးပြု ပစ်ခတ်ခြင်းကြောင့် လွိုင်ကော်မြို့နယ် လယ်ထွဲကျေးရွာ ကလေးကစားကွင်းထဲသို့ ကျရောက်ပေါက်ကွဲ၍ ကလေးငယ် သုံးဦးပွဲ ချင်းပြီး သေဆုံးခဲ့ရသည်။
