ရန်ကုန်တိုင်းဒေသကြီးအတွင်း၌ ယမန်နေ့ တစ်ရက်တည်း မီးလောင်မှု ငါးကြိမ်ဖြစ်ခဲ့ကြောင်း မြန်မာနိုင်ငံမီးသတ်တပ်ဖွဲ့က သတင်းထုတ်ပြန်ထားသည်။
ယမန်နေ့ (မတ်လ ၁၀) ည ၁၂ နာရီကျော်တွင် သာကေတမြို့နယ် တစ်ဆယ်တောင်ရပ်ကွက် ဇေယျဝတီ(၃) လမ်း၌ မီးလောင်မှုဖြစ်ခဲ့ရာ Level -2အဆင့် မီးငြှိမ်းသတ်ယာဉ်များစေလွှတ်မီးငြှိမ်းသတ်ခဲ့ရကြောင်း မီးသတ်က ထုတ်ပြန်ထားသည်။
ယင်းမီးလောင်မှုကြောင့် အိမ်ထောင်စု ၁၃စုမှ လူဦးရေ ၅၄ဦး မီးဘေးသင့်ခဲ့ပြီး အဆိုပါရပ်ကွက်ရှိ နှစ်ကျိပ်ရှစ်ဆူ ဗဟို ဓမ္မာရုံ၌ ကယ်ဆယ်ရေးစခန်းဖွင့်ပေးထားကြောင်း သာကေတသတင်း၏ ဖေ့စ်ဘွတ်ခ်၌ ဖော်ပြထားသည်။
နံနက် ၁ နာရီ အချိန်ခန့်တွင် ထန်းတပင်မြို့နယ် လိပ်ကုန်းကျေးရွာ၌ မီးလောင်မှုဖြစ်ခဲ့ရာ မိနစ်ပိုင်းအတွင်း မီးငြှိမ်းသတ်နိုင်ခဲ့ကြောင်း မီးသတ်တပ်ဖွဲ့က သတင်းထုတ်ပြန်ထားသည်။
Public Service Announcement
ထို့အပြင် နံနက် ၅ နာရီ အချိန်ခန့်တွင် သင်္ဃန်းကျွန်းမြို့နယ် (၂၄)ရပ်ကွက် သံသုမာလမ်း၌ မီးလောင်မှုဖြစ်ခဲ့ရာ မိနစ်ပိုင်းအတွင်း မီးငြှိမ်းသတ်နိုင်ခဲ့ကြောင်း မီးသတ်တပ်ဖွဲ့က ထုတ်ပြန်ထားသည်။
မီးသတ်တပ်ဖွဲ့အနေဖြင့် မီးလောင်မှုဖြစ်သည့် အဆောက် အဦးအကြောင်းကို အသေးစိတ်ဖော်ပြထားခြင်း မရှိသော်လည်း ယင်းမီးလောင်မှုသည် မြို့ပြပျောက်ကျားတပ်ဖွဲ့က အကြမ်းဖက်စစ်ကောင်စီထောက်တိုင် KBZ ဘဏ်ကိုတိုက်ခိုက်သည့် အနေဖြင့် ATM စက်ကို မီးရှို့ဖျက်ဆီးခဲ့ခြင်းဖြစ်သည်ဟု အသိပေးထားသည်။
နေ့လည် ၃ နာရီအချိန်ခန့်တွင် မရမ်းကုန်းမြို့နယ် အမှတ် ၃ ရပ်ကွက်၌ မီးလောင်မှုဖြစ်ခဲ့ရာ မိနစ်ပိုင်းအတွင်း မီးငြှိမ်းသတ်နိုင်ခဲ့သည်ဟု မီးသတ်တပ်ဖွဲ့ကထုတ်ပြန်ထားသည်။
ထို့နောက် ညနေ ၅ နာရီအချိန်ခန့်တွင် ဒဂုံမြို့သစ် အရှေ့ပိုင်း မြို့နယ် လေးထောင့်ကန်ကျေးရွာ ရွှေပိုင်ခန့် အိမ်ရာဝင်း အတွင်း ကိုင်းတော မီးလောင်မှုဖြစ်ခဲ့ရာ နာရီဝက်ခန့် မီးငြှိမ်းသတ်ခဲ့ရကြောင်း မီးသတ်တပ်ဖွဲ့က ထုတ်ပြန်ထားသည်။
ပူပြင်းခြောက်သွေ့သည့် နွေရာသီကို ရောက်ရှိလာသည် နှင့်အမျှ ရန်ကုန်တိုင်းဒေသကြီးအတွင်း၌ ယခုရက်ပိုင်းအတွင်း မီးလောင်မှုများ မကြာခဏ ဖြစ်ပွားလျက်ရှိပြီး မတ်လ ၁ ရက်မှ ၁၁ ရက်အထိ မီးလောင်မှု အကြိမ် ၂၀ ကျော်ရှိကြောင်း မီးသတ်တပ်ဖွဲ့၏ ထုတ်ပြန်ချက်အရ သိရသည်။
