ရန်ကုန်မြို့အပါအဝင် နိုင်ငံတဝန်း၌ လျှပ်စစ်မီးပြတ်တောက်မှုကြောင့် ဖယောင်းတိုင်ထွန်းသပိတ်(Candle Strike)နှင့် ပျက်တိုင်းဆဲကမ်ပိန်းများတွင် ပြည်သူလူထုတရပ်လုံးပါဝင်ပေးကြရန် ရန်ကုန်လူထုသပိတ်က တိုက်တွန်းနှိုးဆော်ထားသည်။
အာဏာသိမ်းစစ်အုပ်စု၏ ညံ့ဖျင်းသော အုပ်ချုပ်မှုပုံစံနှင့် တိုင်းပြည်တိုးတက်ရန် ရှေးရှုမှုမရှိဘဲ ရသမျှအိတ်ကပ်ထဲထည့်သည့်လုပ်ရပ်များကြောင့် တိုင်းပြည်ယိုယွင်းဆုတ်ယုတ်လာကာ ယခုကာလများ၌ သိသာထင်ရှားလှသည့် လျှပ်စစ်မီးပြတ်တောက်မှုအခြေအနေများကိုပါ ပြည်သူလူထုတစ်ရပ်လုံး ရင်ဆိုင်နေကြရပြီဖြစ်ကြောင်း ရန်ကုန်လူထုသပိတ်က ထုတ်ပြန်သည်။
ပြည်သူလူထုတရပ်လုံးက အာဏာသိမ်းစစ်ကောင်စီ၏ မတရားအုပ်ချုပ်မှုစနစ်ကို အလိုမရှိကြောင်းနှင့် တိုင်းပြည်အနာဂါတ် ပြန်လည်ထွန်းတောက်လာစေရန်ရည်ရွယ်ကာ Candle Strike နှင့် ပျက်တိုင်းဆဲကမ်ပိန်း များတွင် ပင်ကိုယ်အသိစိတ်ဓာတ်၊ နာကျည်းတော်လှန်လိုစိတ်များဖြင့် ပါဝင်ဆန္ဒထုတ်ဖော်ကြရန် ရန်ကုန်လူထုသပိတ်က နှိုးဆော်သည်။
ပြီးခဲ့သည့် ဖေဖော်ဝါရီ ၁ ရက်တွင် ကျောက်ပန်းတောင်းမြို့နေ ကိုအောင်အောင်က မိမိကိုယ်ကိုမီးရှို့ကာ ၂၀၀၁/၂၀၀၂ အမှောင်ခေတ်များသို့ ပြန်မသွားရန် နှင့် တော်လှန်ရေးတရပ် ပြန်လည်နိုးကြားလာစေရန် တပ်လှန့်နှိုးဆော်မှုပြုလုပ်ခဲ့သည်။
Public Service Announcement
အကြမ်းဖက်စစ်ကောင်စီသည် မတ်လ ၁၂ မှ ၁၈ ရက်အတွင်း နေရာအချို့တွင် ၂၄ နာရီပတ်လုံးလျှပ်စစ်မီးပြတ်တောက်မည်ဟု ကနဦးကြေညာခဲ့ပြီး နောက်ပိုင်းတွင် အလှည့်ကျစနစ်ဖြင့် မီး ပေးမည်ဟု ပြင်ဆင်ကြေညာခဲ့သည်။
သို့သော် ယင်းကြေညာချက်မတိုင်ခင် ပြီးခဲ့သည့် လပိုင်းကတည်းက စီးပွားရေးမြို့တော် ရန်ကုန် အပါအဝင် နိုင်ငံတဝန်း၌ နေ့စဉ် အနည်းဆုံး ၁၈ နှင့်အထက် လျှပ်စစ်မီးပြတ်တောက်မှုဖြစ် ပေါ် နေခြင်းဖြစ်သည်။
