အကြမ်းဖက်စစ်တပ်ကျူးလွန်ခဲ့သည့် ရာဇဝတ်မှုများအပေါ် စာထုတ် စိုးရိမ်နေခြင်းများကို ရပ်တန့်ကာ လက်တွေ့အရေးယူဆောင်ရွက်ရန် ကုလသမဂ္ဂလူ့အခွင့်အရေးကောင်စီ (UNHRC)ကို တောင်းဆိုသည့်အွန်လိုင်းလက်မှတ်ရေးထိုးလှုပ်ရှားမှုကို စတင်လိုက်သည်။
အဆိုပါ အွန်လိုင်းလက်မှတ်ရေးထိုးလှုပ်ရှားမှုကို https://chng.it/6L4DgmCf မှ တဆင့်ဝင် ရောက် လုပ်ဆောင်နိုင်ပြီး မတ်လ ၁၅ ရက်နောက်ဆုံးထားကာ ပူးပေါင်းပါဝင်နိုင်ကြောင်း ထုတ်ပြန် ထားသည်။
“ယခု petition ကတော့ ဒီလို လူ့အခွင့်အရေး အပြင်းအထန် ကျူးလွန်ချိုးဖောက်နေတဲ့ အကြမ်းဖက်စစ်အုပ်စုကို အရေးယူဆောင်ရွက်နိုင်ရေးအတွက် အချက် ၄ ချက်ပါ တောင်းဆိုချက်များကို ပြည်သူလူထုမှ တောင်းဆိုသော လတ်မှတ်အရေအတွက်နှင့်တကွ ကုလသမဂ္ဂ လူ့အခွင့်အရေးကောင်စီ UNHCRကို ပေးပို့မှာဖြစ်ပါတယ်” ဟု အွန်လိုင်းလက်မှတ်ရေးထိုးလှုပ်ရှားမှု တောင်း ဆိုသူများက ဆိုသည်။
အကြမ်းဖက်စစ်အုပ်စုကို အရေးယူနိုင်ရေး တောင်းဆိုထားသည့်အချက် ၄ ချက်တွင် ယုတ်မာရက်စက်သောရာဇဝတ်မှုများအတွက် ကုလသမဂ္ဂမှ အခွင့်အာဏာအပ်နှင်းထားသော တရားစီရင်ရေးကို တည်ထောင်ခြင်းဖြင့် မြန်မာနိုင်ငံအတွက် တရားမျှတမှု ရရှိရေး ဘက်ပေါင်းစုံက ဆောင်ရွက်ရန်၊ မြန်မာ့အရေး အခြေအနေများကို ICC သို့ ပို့နိုင်ရန်အတွက် ကုလသမဂ္ဂလုံခြုံရေးကောင်စီမှ ဆုံးဖြတ်ချက်တစ်ခု ချမှတ်ရေး အကြံပြုတိုက်တွန်းရန် တို့ပါဝင်သည်။
ထို့အပြင် ၂၀၀၂ ခုနှစ် ဇူလိုင်လ ၁ ရက်နေ့မှစ၍ မြန်မာနိုင်ငံပိုင်နက်အတွင်း ကျူးလွန်ခဲ့သော နိုင်ငံတကာ ရာဇ၀တ်မှုများနှင့်စပ်လျဉ်း၍ ICC တရားရုံး၏ စီရင်ပိုင်ခွင့်အာဏာကို လက်ခံခြင်းအားဖြင့် ရောမသဘောတူစာချုပ် အပိုဒ် ၁၂(၃) အရ မြန်မာအစိုးရ NUG မှ တင်သွင်းသော ကြေညာချက်ကို လက်ခံရေး ICC အား တောင်းဆိုရန်၊ ကုလသမဂ္ဂအထွေထွေညီလာခံမှ ဆက်လက်အတည်ပြုထားသော NUG အစိုးရ၏ သံအမတ်ကြီး ဦးကျော်မိုးထွန်းကို လူ့အခွင့်အရေးကောင်စီတွင် မြန်မာနိုင်ငံကို ကိုယ်စားပြုနိုင်ရေး ပံ့ပိုးပေးရန် တို့ ဖြစ်သည်။