ဒေသတွင်း လုံခြုံရေးအခြေအနေကြောင့် ဖြတ်သန်းခွင့်တားမြစ်ထားခဲ့သည့် ရေဦး – ညောင်လှ လမ်းပိုင်းအား ယနေ့(မတ်လ၁၅ရက်) နံနက်မှစတင်၍ ရေဦးပြည်သူ့ကာကွယ်ရေးအဖွဲ့က ပြန်လည်ဖွင့်လှစ်ပေးလိုက်သည်။
ရေဦး- ညောင်လှလမ်းပိုင်းအား မတ်လ ၁၂ရက် ည၈နာရီကစ၍ ဖြတ်သန်းခြင်းမပြုကြရန် ရေဦးပြည်သူ့ကာ ကွယ်ရေးအဖွဲ့က ကြေငြာခဲ့ခြင်းဖြစ်သည်။ ယခုအခါ ” ပုံမှန်အတိုင်း သွားလာနိုင်ပြီဖြစ်ကြောင်း အသိပေးအပ်ပါသည်”ဟု ယနေ့ နံနက် ၈နာရီတွင် သတင်းထုတ်ပြန်ထားသည်။
ရေဦးမြို့နယ်အတွင်း အကြမ်းဖက်စစ်ကောင်စီက အင်အားအများအပြားဖြင့် လှုပ်ရှားနေပြီး မတ်လ ၁၂ရက်က ဖြစ်စဥ်တွင် အရပ်သားသုံးဦးအား သတ်ဖြတ်သွားခဲ့ပြီး နေအိမ်အချို့မီးရှို့ဖျက်ဆီးသွားခဲ့သည်ဟု ဒေသခံများက ပြောသည်။
ချောင်းရိုးကျေးရွာမှ အပြစ်မဲ့ပြည်သူနှစ်ဦး၊ စိမ်းစားကျေးရွာမှ အပြစ်မဲ့ပြည်သူတစ်ဦး သေနတ်ဖြင့်ပစ်သတ်ခံရပြီး ချောင်းရွာကျေးရွာမှ အိမ်ခြေ (၁၅)လုံးခန့်လည်း မီးရှို့ဖျက်စီးခံခဲ့ရကြောင်း၊ချောင်းရိုးကျေးရွာမှ ခရစ်ယာန်ကျောင်းကိုပါ မီးရှို့ခဲ့သော်လည်း အချိန်မီငြှိမ်းနိုင်ခဲ့သဖြင့် အနည်းငယ်သာ ပျက်ဆီးခဲ့သည်ဟု ရေဦးပြည်သူ့ကာကွယ်ရေးအဖွဲ့က ထုတ်ပြန်သည်။