အာဆီယံအထူးကိုယ်စားလှယ်၊ ကမ္ဘောဒီးယားနိုင်ငံခြား ရေးဝန်ကြီးပရက်ဆော့ခွန်းသည် ပြည်သူ့ပါတီဥက္ကဌ ဦးကိုကိုကြီးနှင့်တွေ့ဆုံခဲ့ကြောင်း ယင်းပါတီက သတင်းထုတ်ပြန်သည်။
အာဏာသိမ်းအကြမ်းဖက်စစ်ကောင်စီနှင့်ဆက်ဆံရေးရှိသည့် (၈၈)မျိုးဆက်ကျောင်းသားခေါင်းဆောင် ဦးကိုကိုကြီးသည် အာဆီယံအထူးကိုယ်စားလှယ်နှင့်တွေ့ဆုံစဥ် အချက် ၄ချက်ကို အဓိက တောင်းဆိုကြောင်း သိရသည်။
ယင်းအချက်များမှာ နိုင်ငံရေးအကျဉ်းသားများ အားလုံးကို လွှတ်ပေးရန်၊ အရပ်သားထိခိုက်သေဆုံးမှုများကို ဘက်အသီးသီးမှ အကာကွယ်ပေးရန်၊ လူသားချင်းစာနာမှုဆိုင်ရာအကူအညီများကိုကျယ်ကျယ်ပြန့်ပြန့် ကူညီထောက်ပံ့ပေးရန် နှင့် အသွင်ကူးပြောင်းရေး ကြားကာလ နိုင်ငံရေးသဘောတူညီမှု တစ်ခုရရှိစေရန် သက်ဆိုင်သူအားလုံးနှင့် တွေ့ဆုံဆွေးနွေးရန်တို့ ဖြစ်ကြောင်း ပြည်သူ့ပါတီက ထုတ်ပြန်သည်။
အာဆီယံအထူးကိုယ်စားလှယ်၏ ယခုခရီးစဥ်သည် မြန်မာပြည်သူလူထု၏ ဆန္ဒနှင့်ကို ထင်ဟပ်မှုမရှိ၍ ပြင်းထန်စွာကန့်ကွက်ကြောင်း တော်လှန်ရေးအင်အားစုများက ထုတ်ပြန်ထားသည်။
မတ်လ ၂၁ရက်တွင် စတင်ခဲ့သော အထူးကိုယ်စားလှယ်၏ ခရီးစဥ်သည် လက်ရှိအချိန်အထိ ပြည်သူလူထုကို ကိုယ်စားပြုသော ရွေးကောက်ခံများနှင့် တွေ့ဆုံခြင်း မရှိသေးဘဲ တရားမဝင်အာဏာသိမ်းခေါင်းဆောင် မင်းအောင်လှိုင်၊ ၎င်းလက်အောက်ရှိ ဝန်ကြီးများနှင့် တွေ့ဆုံဆွေးနွေးခဲ့သည်ကို တွေ့ရသည်။