စစ်ကိုင်းတိုင်း မင်းကင်းမြို့နယ်တွင် အကြမ်းဖက်စစ်ကောင်စီအား ခုခံတိုက်ခိုက်ရင်း ဒေသတွင်းပြည်သူ့ကာကွယ်ရေးတပ်ဖွဲ့တစ်ဖွဲ့မှ လူငယ်ရဲဘော်တစ်ဦးကျဆုံးခဲ့ရသည်။
မတ်လ ၁၅ရက် နံနက်ပိုင်းက မင်းကင်းမြို့နယ် တောင်ပိုင်း ကူလဲရွာအနီး၌ ဖြစ်ပွားခဲ့သော ထိတွေ့တိုက်ပွဲတွင် ကနီပြည်သူ့ကာကွယ်ရေးတပ်ဖွဲ့(၂) (KPDF2)၊ တပ်ရင်း (၂)၊ တပ်ခွဲ(၃)မှ တပ်စုမှူးနိုင်လင်းသည် နိုင်ငံတော်အတွက် အသက်ပေးလှူ၍ မြင့်မြတ်စွာ ကျဆုံးခဲ့ရကြောင်း၊ မြင့်မြတ်စွာကျဆုံးသွားသော ရဲဘော်နိုင်လင်းအား ကနီပြည်သူ့ကာကွယ်ရေးတပ်ဖွဲ့၊ တပ်ရင်း(၂) အနေဖြင့် မိသားစုနှင့်ထပ်တူထပ်မျှ ဝမ်းနည်းကြေကွဲရပါကြောင်းနှင့် အာဇာနည်ရဲဘော်၏ ဆောင်ရွက်လက်စဖြစ်သော စစ်အာဏာရှင်စနစ် အမြစ်ဖြတ်ခြေမှုန်းရန်နှင့် ဖက်ဒရယ်ဒီမိုကရေစီရရှိရန်အတွက် ကျန်ရှိနေသေးသောတာဝန်များကို ကျန်ရစ်သူ ကျွန်ုပ်တို့ရဲဘော်များက ဆက်လက်ထမ်းဆောင် တိုက်ပွဲဝင်သွားမည်ဖြစ်ပါကြောင်း ဝန်ခံကတိပြုပါသည်ဟု ကနီမြို့နယ်ပြည်သူ့ကာကွယ်ရေးတပ်ဖွဲ့ (၂)က အသိပေးသည်။
“အဲတုန်းက စစ်ကောင်စီဘက်က ငါးယောက်လောက်ကျလိုက်တယ်”ဟု ကနီမြို့နယ်ပြည်သူ့ကာကွယ်ရေးတပ်ဖွဲ့ (၂) တာဝန်ရှိသူက ပြောသည်။
စစ်အာဏာရှင်စနစ်ကို ရဲရဲဝံ့ဝံ့ဆန့်ကျင်တော်လှန်ရင်း နောင်အနာဂတ် မျိုးဆက်သစ် လူငယ်များအတွက် မြင့်မြတ်စွာအသက်ပေး တိုက်ပွဲဝင်သွားသော ရဲဘော်နိုင်လင်းအား အလေးနီပြုပါသည်ဟု ထုတ်ပြန်ချက်တွင် ဖော်ပြသည်။