ချင်းပြည်နယ် မင်းတပ်မြို့မှတစ်ဆင့် မတူပီမြို့သို့ ရိက္ခာပို့ ဆက်လက်ထွက်ခွာသွားသည့် ယာဉ်တန်းနှင့် မင်းတပ် ချင်းဒေသကာကွယ်ရေးတပ်(CDF)တို့အကြား တိုက်ပွဲများ ဖြစ်ပွားနေကြောင်း မင်းတပ် CDF ပြောရေးဆိုခွင့် ရှိသူ ဆလိုင်းဟာအွမ်က ပြောကြားသည်။
ပြီးခဲ့သည့် ရက်ပိုင်းက မကွေးတိုင်း ကျောက်ထုမြို့မှ မင်းတပ်သို့ ရောက်ရှိလာသည့် တင့်ကား ၂စီးနှင့် ယာဉ်စီးရေ ၈၀ ကျော်ပါ စစ်ယာဉ်တန်းသည် မင်းတပ်မှ မတူပီသို့ ဆက်လက်ထွက်ခွာသွားရာလမ်းခရီး၌ မင်းတပ် CDF တပ်များနှင့် တိုက်ပွဲဖြစ်ပွားနေခြင်းဖြစ်သည်။
စစ်ကောင်စီတပ်သည် အဆိုပါဒေသသို့ ဖုန်းလိုင်းများ ဖြတ်တောက်ထား၍ တိုက်ပွဲသတင်း အသေးစိတ်ကို မရရှိသေးကြောင်း ဆလိုင်းဟာအွမ်က ပြောသည်။
“တိုက်ပွဲကတော့ ရှိတယ်။ တ၀ုန်း၀ုန်းနဲ့ အစောပိုင်းကတော့ ကြားတယ်။ မနက်ကတည်းက”ဟု ၎င်းကဆိုသည်။
တိုက်ခိုက်ရေးတပ်ရင်းများနှင့် အဆက်အသွယ်မရသေး၍ မည်သည့်နေရာ၌ တိုက်ပွဲဖြစ်ပွားနေသည်ကို အသေးစိတ်မသိရသေးကြောင်း၊ စစ်ကောင်စီတပ်ယာဉ်တန်းအနေဖြင့် ယနေ့တွင် မင်းတပ် -မတူပီလမ်း မိုင်တိုင် (၂၂)မိုင်ထက် ပိုမရောက်နိုင်ကြောင်း ဆလိုင်းဟာအွမ်က ပြောသည်။
မိုင် ၁၀၀ခန့်သာရှိသည့် မင်းတပ် -မတူပီလမ်းကို စစ်ကောင်စီတပ်ယာဉ်တန်းများ ဖြတ်သန်းစဉ် CDF က ကြားဖြတ်တိုက်ခိုက်မှုများ အကြိမ်ကြိမ် ပြုလုပ်ခဲ့၍ တစ်ပတ်ကျော်ကြာ ခရီးကြာမြင့်ခဲ့သည်။
“ဒီလမ်းက တောက်လျှောက်ကျွန်တော်တို့ ရှိနေတဲ့အတွက် ဒီခရီးက အဲဒီလောက်ပဲ ကြာမှာပါ” ဟု မင်းတပ် CDF ပြောရေးဆိုခွင့်ရှိသူ ဆလိုင်းဟာအွမ်က ပြော သည်။