မြောင်မြို့နယ်ရဲစခန်းအား ယနေ့(မတ်လ ၂၈ ရက်)ညနေ ၆နာရီ ၄၅မိနစ်အချိန်က မြောင်မြို့နယ်တော်လှန်ရေးတပ်(MRA)၊ စစ်ကိုင်းခရိုင် တပ်ရင်း(၁)တပ်ခွဲ-၁ နှင့် Zarmani Revolution Force ပြောက်ကျားတပ်ဖွဲ့ စသည့် ညီနောင်တော်လှန်ရေးအင်အားစုသုံးဖွဲ့ ပူးပေါင်း၍ ရှေ့ထွက်မိုင်းဖြင့် တိုက်ခိုက်ခဲ့ကြောင်း၊ တချိန်တည်းမှာပင် မြောင်မြို့ တောင်ရပ်ကွက်ရှိ Mytel တာဝါတိုင်ကို လက်ပစ်ဗုံးဖြင့် ပစ်ခတ်ဖောက်ခွဲခဲ့ကြောင်း MRA က ဆိုသည်။
အဆိုပါ တိုက်ခိုက်မှုများတွင် စစ်ကောင်စီ၏ သေဆုံးထိခိုက်မှုအခြေအနေကို မသိရသေးဘဲ တော်လှန်ရေးအင်အားစုများ အထိအခိုက်မရှိဘဲ ဆုတ်ခွာနိုင်ခဲ့ သည်ဟု ဖော်ပြထားသည်။
ထိုဖြစ်စဥ်နှင့်ပတ်သက်၍ မြောင်မြို့နယ်တော်လှန်ရေးတပ်(MRA)သို့ ဆက်သွယ်မေးမြန်း ထားသော်လည်း ပြန်လည်ဖြေကြားခြင်း မရှိသေးပါ။
မြောင်မြို့တွင် ယမန်နေ့(မတ်လ ၂၇ ရက်)ညနေ ၄နာရီခန့်က အကြမ်းဖက် စစ်ကောင်စီ တပ်များသည် မြို့တောင်ဘက်အထွက်သို့ ကားတစ်စီးဖြင့် ထွက်ခွာလာစဥ် ညီနောင် တော်လှန်ရေးအင်အားစု သုံးဖွဲ့ပူးပေါင်း၍ မိုင်းဆွဲတိုက်ခိုက်ခဲ့ကြောင်း၊ အဆိုပါတိုက်ခိုက်မှုတွင် စစ်ကောင်စီတပ်သား နှစ်ဦးသေဆုံးပြီး အများအပြားအပြင်းအထန်ဒဏ်ရာများ ရရှိသွား ကြောင်း MRAက ထုတ်ပြန်ထားသည်။
မြောင်မြို့နယ်တော်လှန်ရေးတပ်(MRA)သည် ပြောက်ကျားစစ်ဆင်ရေးများကို အရှိန်အဟုန်ဖြင့် လုပ်ဆောင်နေပြီဖြစ်ကြောင်း၊ ပြည်သူများအထိအခိုက် မရှိစေရန် အထူးဂရုပြုဆောင်ရွက် လျက်ရှိပြီး ပြည်သူများအနေဖြင့်လည်း အကြမ်းဖက်စစ်ကောင်စီတပ်၏ လှုပ်ရှားမှုများကို သတိကြီးစွာထား၍ ဂရုတစိုက်ရှောင်ရှားသွားလာကြရန်လည်း အသိပေးထားသည်။