ချင်းပြည်နယ် မင်းတပ်မြို့တစ်နေရာရှိ စစ်ကောင်စီတပ်ကို ယနေ့နံနက်က သွားရောက် တိုက်ခိုက်ခဲ့ကြောင်း မင်းတပ်ချင်းဒေသကာကွယ်ရေးတပ်(CDF) ပြောရေးဆိုခွင့်ရှိသူ ဆလိုင်းဟာအွမ်က အတည်ပြုပြီး မင်းတပ် – မတူပီလမ်း တစ်နေရာ၌လည်း တိုက်ပွဲဖြစ်ပွား နေသည်ဟု ပြောကြားသည်။
“မြို့ပေါ်မှာ ဖြစ်တာပါ။ CDFက သွားရောက်တိုက်ခိုက်တာပါ။ လုံလုံခြုံခြုံနဲ့ အထိအခိုက် မရှိပြန်လာနိုင်တယ်။ တိုက်ပွဲအခြေအနေနဲ့ (စစ်ကောင်စီတပ်ဖွဲ့ဝင်) ဘယ်လောက်ကျတယ် ဆိုတာ အတိအကျမသိရသေးဘူး”ဟု ဆလိုင်းဟာအွမ် က ပြောသည်။
အသေးစိတ်အခြေအနေများကိုလည်း သတင်းထုတ်ပြန်သွားမည်ဖြစ်ကြောင်း ၎င်းက ဆက်ပြောသည်။ ထို့အပြင် မင်းတပ် -မတူပီ လမ်းပိုင်းတစ်နေရာ၌လည်း ထူးခြားမှုရှိကြောင်း ဆလိုင်းဟာအွမ်က ပြောသည်။
“တိုက်ပွဲတွေပြင်းပြင်းထန်ထန်ဖြစ်နေတယ်။ ကျွန်တော်တို့ CDF ရဲဘော်တွေ ဘေးအန္တရာယ် ကင်းဖို့ အားလုံးဆုတောင်းပေးဖို့ အဲဒီလောက်ပဲ တောင်းဆိုချင်ပါ တယ်”ဟု ၎င်းက ဆိုသည်။
မင်းတပ်ဒေသ စစ်ရေးသတင်းများကို ပုံမှန်ဖော်ပြနေသူတစ်ဦးကလည်း ယနေ့နံနက် ၇နာရီခန့်က မင်းတပ်မြို့ ဘ၀သစ်ရပ်ကွက်အနီးတွင် ပစ်ခတ်သံများကြားရကြောင်း ရေးသားထားသည်။ ရဲစခန်းကုန်းပေါ်မှ ပစ်ကူပေးနေပြီး နာရီဝက်အကြာတွင် ပစ်ခတ်သံများ ပြန်ငြိမ်းသွားကြောင်း ဖော်ပြထားပြီး မြို့နေ လူထုများဂရုစိုက်သွားလာရန်လည်း တိုက်တွန်း ထားသည်။
ထို့ပြင် နံနက်၈နာရီခန့်တွင် မင်းတပ် -မတူပီလမ်းပိုင်း၌ လက်နက်ကြီးသံများ ပေါက်ကွဲသံများ ကြားနေရကြောင်း ၎င်းက ဆိုသည်။
မကွေးတိုင်း ကျောက်ထုလေယာဉ်ကွင်းမှ ထွက်လာသည့် တင့်ကား နှစ်စီးနှင့် ယာဉ်အစီးရေ ၈၀ခန့်ပါ စစ်ကောင်စီယာဉ်တန်းသည် မင်းတပ်မှတစ်ဆင့် မတူပီမြို့သို့ ထွက်ခွာသွားရာ မတ်လ ၂၆ရက်မှစ၍ မင်းတပ် -မတူပီ လမ်းပိုင်း၌ တိုက်ပွဲဖြစ်ပွားနေပြီး စစ်ကောင်စီတပ်မှ သေဆုံးထိခိုက်မှုများရှိနေသည်။