ရေစကြိုမြို့နယ်တွင် မိုင်းဆွဲတိုက်ခိုက်ခံရသည့်အဖွဲ့ကို စစ်ကူလာသည့် စစ်ကောင်စီတပ် ထပ်မံမိုင်းဆွဲခံရ၍ ​သေဆုံးမှုများ

မ​ကွေးတိုင်း ရေစကြိုမြို့နယ် ဆင်ချောင်းရွာနှင့် ဇီးကုန်းရွာကြားတွင် မိုင်းဆွဲခံရ၍ စစ်ကောင်စီတပ်သားသုံးဦးသေဆုံးခဲ့ပြီး စစ်ကူလာသည့် စစ်ကောင်စီကားလေးစီးပါ ထပ်မံမိုင်းဆွဲခံရပြီး သေဆုံးသူများပြားကြောင်း ပြည်သူကာကွယ်ရေးတပ်ဖွဲ့ -ရေစကြိုမြို့နယ်က အသိ​ပေးထုတ်ပြန်သည်။

“အခု ဆင်ချောင်းရွာနဲ့ ဇီးကုန်းရွာဆိုတာ ပျူရွာတွေဗျ။ဒီကောင်တွေက မလုပ်နိုင်ပါဘူးဆိုပြီး တွက်ဆပြီးထွက်လာတာ။ကျွန်တော်တို့ကလည်း အသင့်ကို စောင့်နေတာ။ပြီးတော့ ဒီကောင်တွေက စစ်ကားကို မသုံးဘူး ဟိုက်ဂျက်ကားသုံးပြီးလာတာ”ဟု ပြည်သူကာကွယ်ရေးတပ်ဖွဲ့ -ရေစကြိုမြို့နယ်မှ ရဲဘော်ဝေကြီးက People’s Springသို့ ပြောသည်။

ပထမတစ်ကြိမ် မိုင်းဆွဲတိုက်ခိုက်မှုကို ယနေ့(မတ်လ၂၉ရက်)နံနက် ၁၁ နာရီခန့်က မိုင်းနှစ်လုံးဆွဲတိုက်ခိုက်ခဲ့ပြီး စစ်ကောင်စီကား တစ်စီးမှာထိခိုက်ပျက်စီးပြီး မိုင်းဆွဲခံရသည့်နေရာ၌ပင်ကားပေါ်ပါသူ စစ်ကောင်စီတပ်သား သုံးဦးသေဆုံးပြီး ငါးဦးခန့် အပြင်းအထန်ဒဏ်ရာရရှိသည်ဟု ၎င်းက ဆိုသည်။

ထို့နောက် နေ့လယ် ၁နာရီခန့်တွင် မိုင်းဆွဲခံရသည့် ကားနှင့် သေဆုံးဒဏ်ရာရသူများကို စစ်ကောင်စီက ကားလေးစီးဖြင့် လာရောက်သယ်ယူချိန်၌ မိုင်းနှစ်လုံးထပ်ဆွဲခဲ့သည်။

Public Service Announcement

“အဲဒီဖြစ်စဥ်မှာ ပိုများနိုင်တယ်။ကျွန်တော်တို့ အတည်အကျ သတင်းမရသေးလို့သာ မထုတ်ပြန်သေးတာ။ကားလေးစီးလုံးနေရပ်မှာ ထိုးရပ်သွားတာ။မိုင်းဆွဲခံရပြီးတော့ စခတွေက ပြန်ပစ်တာတွေတော့ ရှိတယ်”ဟု ရဲဘော်ဝေကြီးက ရှင်းပြသည်။

ယနေ့ မိုင်းဆွဲ တိုက်ခိုက်ခဲ့သည့် ဖြစ်စဥ်နှစ်ခုစလုံးတွင် ပြည်သူကာကွယ်ရေးတပ်ဖွဲ့ဝင်များ အထိ အခိုက်မရှိခဲ့ကြောင်းလည်း ပြည်သူကာကွယ်ရေးတပ်ဖွဲ့ -ရေစကြိုမြို့နယ်က အသိပေးသည်။