စစ်ကိုင်းတိုင်း ကလေးမြို့တွင် သေနတ်ပစ်ခတ်သံများနှင့်ပေါက်ကွဲသံများ ယနေ့ တစ်နေ့လုံးနီးပါး ကြားနေရသည်ဟု ဒေသခံများက ပြောသည်။
စစ်ကောင်စီ၏ ကင်းစခန်းကို ယနေ့(မတ် ၂၉ ရက်) နံနက် ၆နာရီခန့်က PDF(ကလေး)က ဝင်ရောက်တိုက်ခိုက်ပြီးနောက် နေ့လယ်ပိုင်းနှင့် ညဦးပိုင်းတွင်ပေါက်ကွဲများ ဆက်တိုက်ကြားနေရသည်ဟု ဒေသခံများကပြောသည်။
“သေနတ်သံဗုံး၊ သံကျယ်ချက်ကတော့ တော်တော်ဝေးဝေးကကြားရတယ်။ ဆက်တိုက်နီးပါးပေါက်နေတာ”ဟု ကလေးမြို့ခံတစ်ဦးက ပြောသည်။
နေ့လယ်ပိုင်းတွင် ကလေးမြို့ တာဟန်းရပ်ကွက်အနီးရှိ ညောင်တောရွာအနီးတွင် လက်နက်ကြီး ပေါက်ကွဲသံနှစ်ချက်လည်းကြားခဲ့သည်ဟု အခြားဒေသခံတစ်ဦးကပြောသည်။
Public Service Announcement
ကလေးမြို့ တာဟန်း သပိတ်ခံတပ်ဖြိုခွင်းခံရပြီးနောက် Kalay Civil Army(KCA)တည်ထောင်ခြင်း တစ်နှစ်ပြည့်အထိမ်းအမှတ်အဖြစ် တာဟန်းရပ်ကွက်၊ ဗိုလ်ချုပ်လမ်းမနှင့် ဝယ်စလီဆေးရုံလမ်းထောင့်ရှိ အကြမ်းဖက်စစ်ကောင်စီတပ် ကင်းစခန်းကို မတ် ၂၉ ရက်တွင် PDF ကလေးက သွားရောက်တိုက်ခိုက်ခဲ့ခြင်းဖြစ်သည်။
ထိုတိုက်ခိုက်မူကြောင့် စစ်ကောင်စီတပ်သား နှစ်ဦးထိမှန်ပြီး PDFများဘက်မှ အထိအခိုက်မရှိ ပြန်လည်ဆုတ်ခွာနိုင်ခဲ့သည်ဟု ဆိုသည်။
စစ်တပ်အာဏာသိမ်းပြီးနောက် လက်နက်ကိုင်ခုခံမူများထဲတွင် ကလေးမြို့တာဟန်းရပ်ကွက်ရှိ သပိတ်ခံတပ်သည် အထင်ရှားဆုံးဖြစ်သည်။
အဆိုပါခံတပ်ကို အကြမ်းဖက်စစ်တပ်က အင်အားအလွန်ကျွံသုံးပြီး လက်နက်ကြီး၊လက်နက်ငယ်များ ၂၀၂၁ မတ် ၂၈ ရက်နှင့် ဧပြီ ၇ရက်တွင် စစ်မြေပြင်သဖွယ် ပစ်ခတ်ဖြိုခွင်းခဲ့ သည်။ ထိုကြောင့် ဆန္ဒပြသူများဘက်မှ အနည်းဆုံး ၁၈ဦးသေဆုံးပြီး ဖမ်းဆီးခံရသူနှင့် ဒဏ်ရာရရှိသူ အမြောက်အမြားရှိခဲ့သည်။
