ကိုးကန့်လက်နက်ကိုင်တပ် (MNDAA) တည်ထောင်သူနှင့် ဥက္ကဌဟောင်း ဖြစ်သည့် ဦးဖုန်ကြားရှင်၏ ဈာပနအခမ်းအနားသို့ ဒုတိယဝန်ကြီးနှစ်ဦး ပါဝင်သည့် ကိုယ်စားလှယ်အဖွဲ့ ကို စေလွှတ်ခဲ့ကြောင်း အမျိုးသား ညီညွတ်ရေးအစိုးရ(NUG)က သတင်းထုတ်ပြန်သည်။
ဦးဖုန်ကြားရှင်၏ ဈာပနအခမ်းအနားကို မတ် ၂၉ ရက်မှ ၃၁ရက်အထိ မိုင်းလားလက်နက် ကိုင်အဖွဲ့(NDAA)နယ်မြေ၌ ပြုလုပ်ခဲ့သည်။
မိုင်းလားမြို့ ငြိမ်းချမ်းရေး ရင်ပြင်တွင် ပြုလုပ်ခဲ့သည့် ဈာပနအခမ်းအနားသို့ NUGမှ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဒုတိယဝန်ကြီး ခွန်းဘီထူး၊ ဖက်ဒရယ် ပြည်ထောင်စုရေးရာဝန်ကြီးဌာန ဒုတိယဝန်ကြီး ဦးချစ်ထွန်းတို့ ဦးဆောင် တက်ရောက်ခဲ့ကြောင်း ဖော်ပြထားသည်။
မြန်မာအမျိုးသားဒီမိုကရက်တစ်မဟာမိတ် တပ်မတော်ဟု ခေါ်ဆိုသည့် MNDAA ခေါင်းဆောင် ဦးဖုန်ကြားရှင်သည် ဖေဖော်ဝါရီ ၁၆ရက်တွင် ကွယ်လွန်ခဲ့ပြီး ရက်ပေါင်း ၄၀ကျော်အကြာတွင် ဈာပန အခမ်းအနား ကျင်းပခဲ့ရာ လူဦးရေ ၃ထောင်ခန့် တက်ရောက်ခဲ့သည်။
“ဒီနေ့က ဥက္ကဋ္ဌဟောင်းကို တောင်ပေါ်မှာ သင်္ဂြိုင်းဂူချတာပေါ့။ဒီနေ့ သူတို့ ပြန်လာရင်တော့ ဈာပနက ပြီးသွားပါပြီ” ဟု MNDAA တပ်ဖွဲ့ဝင်တစ်ဦးက ပြောသည်။
ဦးဖုန်ကြားရှင် ကွယ်လွန်ခဲ့ခြင်းအတွက် အမျိုးသားညီညွတ်ရေးအစိုးရအနေဖြင့် တော်လှန်ရေးအင်အားစုများနှင့်ထပ်တူ ဝမ်းနည်းပူဆွေးရကြောင်း၊ နှစ်ပေါင်းများစွာကြာ မိမိယုံကြည်ရာ တော်လှန်ရေးခရီးလမ်းကို လျှောက်လှမ်းခဲ့သည့် ဦးဖုန်ကြားရှင် ကောင်းမွန်စွာအနားယူနိုင်ပါစေကြောင်း ဆုမွန်ကောင်းတောင်းအပ်သည်ဟု NUGက ထုတ်ပြန်သည်။