အာဏာသိမ်းပြီးနောက်ပိုင်း စစ်ကောင်စီတပ် မီးရှို့ခဲ့သည့် ပြည်သူလူထုနေအိမ် ၈,၀၀၀ နီးပါးရှိလာ

အကြမ်းဖက်စစ်ကောင်စီတပ်က ယခုတစ်ပတ်အတွင်း ပြည်သူလူထု နေအိမ်များကို ထပ်မံ မီးရှို့မှုများ ပြုလုပ်ခဲ့၍ အိမ်ခြေ ၂၅၀ခန့် ထပ်မံပျက်စီးခဲ့ရာ အာဏာသိမ်းပြီးနောက် စစ်ကောင်စီနှင့် လက်အောက်ခံအဖွဲ့များ မီးရှို့ဖျက်ဆီးခဲ့သည့် အိမ်ခြေ ၈,၀၀၀ နီးပါး ရှိလာ ကြောင်း Data for Myanmar က ယနေ့ ထုတ်ပြန်သည်။

၂၀၂၁ ဖေဖော်ဝါရီ ၁ရက်မှ ၂၀၂၂ မတ်လ ၃၁ရက်အတွင်း စစ်ကောင်စီတပ်နှင့် လက်အောက်ခံ အဖွဲ့အစည်းများက နေရာပေါင်း ၂၂၂ နေရာ၌ မီးရှို့ဖျက်ဆီးမှုများ ပြုလုပ်ခဲ့ရာ လူနေအိမ်ပေါင်း ခန့်မှန်းခြေ ၇,၉၇၃ လုံး ပျက်စီးခဲ့ရသည်ဟု ထုတ်ပြန်ထားသည်။

ပြီးခဲ့သည့် မတ်လ ၂၂ရက်အထိ စာရင်းများအရ စစ်ကောင်စီတပ်က နေရာ ၂၁၂ နေရာမှ နေအိမ် ၇,၇၂၉ လုံးကို မီးရှို့ဖျက်ဆီးခဲ့ရာ ယခုတစ်ပတ်အတွင်း နေရာ ၁၀ခုမှ အိမ်ခြေ ၂၄၄ လုံးထပ်မံ ဖျက်ဆီးခံရခြင်းဖြစ်သည်။

သတင်းမီဒီယာများ၌ ဖော်ပြသည့် တိုက်ပွဲသတင်းများ နေအိမ်မီးရှို့ခံရမှုများကို ပြန်လည်စိစစ် ရေတွက်ထားခြင်းဖြစ်ပြီး ဒေသခံ လူအခွင့်အရေးအဖွဲ့များနှင့် စစ်ရှောင်ကူညီရေး အဖွဲ့များက ထုတ်ပြန်သည့် စာရင်းများကို အခြေခံထားကြောင်း၊ မပြည့်စုံသည့် အချက်အလက်များ ချန်ထားခဲ့ရ၍ မီးရှို့ဖျက်ဆီးခံရသည့် အရေအတွက်မှာ မြေပြင်၌ ပိုများနိုင်ကြောင်း ဖော်ပြ ထားသည်။

Public Service Announcement

စစ်ကောင်စီတပ် မီးရှို့ခဲ့သည့် အိမ်ခြေ ၈,၀၀၀ နီးပါးအနက် ၅,၀၀၀ နီးပါးသည် စစ်ကိုင်းတိုင်း အတွင်းရှိ ပြည်သူလူထု နေအိမ်များဖြစ်သည်။ မကွေးတိုင်းအတွင်းမှ ပြည်သူလူထု နေအိမ် ၁,၃၀၀ နီးပါး၊ ချင်းပြည်နယ်မှ အိမ်ခြေ ၁,၁၀၀ကျော် ၊ ကယားပြည်နယ်မှ အိမ်ခြေ ၄၀၀ ကျော် မီးရှို့ဖျက်ဆီးခံခဲ့ရသည်။

မီးရှို့ဖျက်ဆီးခံရသည့် အိမ်ခြေ ၈,၀၀၀ နီးပါးအနက် ၂၀၂၂ ဇန်နဝါရီမှ မတ်လကုန်အထိ သုံးလတာအတွင်း အိမ်ခြေ ၅,၈၀၀ နီးပါးကို စစ်ကောင်စီတပ်က မီးရှို့ဖျက်ဆီးခဲ့သည်။

ထို့ကြောင့် စစ်ကောင်စီတပ်သည် ပြည်သူလူထု နေအိမ်များကို ပစ်မှတ်ထား တိုက်ခိုက် ဖျက်ဆီးမှုများကို ရည်ရွယ်ချက်ရှိရှိ ပို၍ လုပ်ဆောင်နေသည်ကို တွေ့ရသည်။