ကရင်အမျိုးသားအစည်းအရုံး(KNU/KNLA) တပ်မဟာ (၁)နယ်မြေ သထုံမြို့နယ်၊ ကမာစိုင်ကွက်သစ်ရှိစစ်ကောင်စီ၏ကင်းပုန်းအား ယမန်နေ့က တိုက်ခိုက်ခဲ့ရာ စစ်ကောင်စီတပ်မှ သုံးဦးထက်မနည်းသေဆုံးခဲ့သည်ဟု သထုံ ပြည်သူ့ကာကွယ်ရေးတပ်(TPDF)က ထုတ်ပြန် သည်။
မတ်လ ၃၁ရက် နံနက်ပိုင်းက စစ်ကောင်စီကင်းပုန်းအား KNLA တပ်မဟာ(၁)တပ်ရင်း(၂)နှင့် သထုံ PDF တို့ လက်နက်ကြီး လက်နက်ကယ်များဖြင့် တိုက်ခိုက်ခဲ့ခြင်းဖြစ်သည်ဟု ဖော်ပြထားသည်။
KNUနှင့် သထုံ PDF ပူးပေါင်းအဖွဲ့သည် မတ်လ ၂၁ရက် မှစ၍ ဒေသတွင်းရှိ စစ်ကောင်စီတပ်များကို သွားရောက်တိုက်ခိုက်မှုများ ခပ်စိပ်စိပ်လုပ်ဆောင်ခဲ့ရာ စစ်ကောင်စီတပ်မှ သေဆုံးထိခိုက်မှုများရှိခဲ့သည်။
မတ်လ ၂၁ရက်က သထုံမြို့နယ် ဝင်းပကျေးရွာနှင့် ဝီယော်ကျေးရွာရှိ စစ်ကောင်စီတပ်စခန်းနှစ်ခု၊ မတ်လ ၂၆ရက်က ပိန္နဲတောကျေးရွာရှိ အမှတ်(၈) ရှေ့တန်း ကွပ်ကဲရေးဌာနချုပ် အထိုင်စခန်းနှင့် ရှေ့တန်းစခန်း နှစ်ခု၊ မတ်လ ၂၈ရက်တွင် ဘီးလင်းမြို့ ရဲစခန်းနှင့် မြို့နယ်ထွေအုပ်ရုံး၊ မတ်လ ၂၈ရက်၌ပင် ဘီးလင်းတိုးဂိတ်ဟောင်းအနီး ရှိ စစ်ကောင်ဏီတပ်များကို တိုက်ခိုက်ခဲ့ပြီး မတ်လ ၂၉ရက်တွင်လည်း စစ်ကောင်စီကင်းပုန်းနှင့် စစ်ယာဉ်တန်းကို တိုက်ခိုက်ခဲ့သည်။ အဆိုပါ တိုက်ခိုက်မှုများအတွင်း စစ်ကောင်စီတပ်မှ သေဆုံးထိခိုက်မှုများရှိခဲ့သည်။
Public Service Announcement
