စစ်ကိုင်းတိုင်း ယင်းမာပင်မြို့နယ်တွင် အကြမ်းဖက်စစ်ကောင်စီအား ခုခံတိုက်ခိုက်နေသည့် ဒေါင်းလုလင် -LPDF မှ လူငယ်ရဲဘော်နှစ်ဦး လက်နက်ကြီးစမ်းသပ်စဥ်နှင့် လက်နက်ချို့ယွင်းမှုဖြစ်စဥ်တို့တွင် ကျဆုံးခဲ့ရသည်။
ဒေါင်းလုလင် -LPDF ၏ တပ်စု(၁)မှ အသက် (၂၆)နှစ်အရွယ် ရဲဘော်ကျော်မြင့်ဌေးသည်၆၀ မမလက်နက်ကြီးစမ်းသပ်ရင်း ပြီးခဲ့သည့် ဖေဖော်ဝါရီ ၁၇ ရက်က ကျဆုံးခဲ့ကြောင်း၊ အလားတူ ပြီးခဲ့သည့် မတ်လ ၁၈ ရက်ကလည်း ဒေါင်းလုလင် -LPDF ၏ တပ်စု (၂)မှ အသက် (၂၃)နှစ်အရွယ် ရဲဘော်ဇော်နိုင်ထွန်းသည် လက်နက်ချို့ယွင်းမှု ဖြစ်ပွားခဲ့ပြီး ကျဆုံးခဲ့ကြောင်း၊ ၎င်းတို့သည် စစ်အာဏာရှင်ကျဆုံးရေးနှင့် ဖယ်ဒရယ်ဒီမိုကရေစီပြည်ထောင်စု တည်ဆောက်ရေး အသက်ပေးလှူ၍ မြင့်မြတ်စွာကျဆုံးခဲ့ခြင်းဖြစ်ကြောင်း ဒေါင်းလုလင် -LPDF က ထုတ်ပြန်သည်။
ဒေါင်းလုလင် -LPDF အနေဖြင့် မိသားစုနှင့် ထပ်တူ ထပ်မျှ ဝမ်းနည်းကြေကွဲရပါကြောင်း၊ အာဇာနည်ရဲဘော်၏ ဆောင်ရွက်နေဆဲဖြစ်သော စစ်အာဏာရှင် စနစ် အမြစ်ပြတ်ချေမှုန်းရန်နှင့် ဖက်ဒရယ်ဒီမိုကရေစီရရှိရန်နှင့် ကျန်ရှိနေသောတာဝန်များကို ကျန်ရစ်သူရဲဘော်များက ဆက်လက်ထမ်းဆောင်တိုက်ပွဲဝင်သွားမည်ဟု ဒေါင်းလုလင်-LPDF က ကတိပြုသည်။
စစ်အာဏာရှင်စနစ်ကို ရဲရဲဝင့်ဝင့် ဆန့်ကျင်တော်လှန်ရင်း အနာဂတ်မျိုးဆက်သစ်လူငယ်များအတွက် မြင့်မြတ်စွာအသက်ပေးတိုက်ပွဲဝင်သွားသော ရဲဘော်အားအလေးနီပြုကြောင်း ဒေါင်းလုလင် -LPDF ၏ ထုတ်ပြန်ချက်များတွင် ဖော်ပြထားသည်။
ဒေါင်းလုလင် – LPDF တပ်ဖွဲ့သည် စစ်အာဏာသိမ်းချိန်မှစ၍ ယခုထက်တိုင် စစ်အာဏာရှင်စနစ်ကိုတော်လှန်နေသော ယင်းမာပင်မြို့နယ်အခြေပြုဒေသခံပြည့်သူကာကွယ်ရေးတပ်မတော်(LPDF)ဖြစ်ပြီး အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာန (MOD)နှင့် ပြီးခဲ့သည့်နှစ် နိုဝင်ဘာ၁ ရက်ကအချိတ် အဆက်ရခဲ့သည်။
တပ်ဖွဲ့သည် အမျိုးသားညီညွတ်ရေးအစိုးရ(NUG)၊ကာကွယ်ရေးဝန်ကြီးဌာန(MOD)လက်အောက်တွင် ဗဟိုအမိန့်ပေးစနစ်(Chain Of Command)ကိုလိုက်နာဆောင်ရွက်သွားမည်ဖြစ်ပြီး စစ်ဖက်ဆိုင်ရာကျင့်ဝတ်များ၊စစ်သည်တော်ကျင့်ဝတ်များနှင့်အညီ လိုက်နာကျင့်သုံးသွားမည်ဖြစ်ကြောင်း၊ ဒေါင်းလုလင် – LPDF အနေဖြင့်ဒေသခံပြည်သူတို့၏ လုံခြုံရေးကိုအထူးအလေးပေးဆောင်ရွက်သွားမည်ဖြစ်ပြီး စစ်အာဏာ ရှင်စနစ်ကိုအမြတ်ပြတ်ချေမှုန်းပြီးဖက်ဒရယ်ဒီမိုကရေစီပြည်ထောင်စု ပေါ်ပေါက်လာသည်အထိ တော်လှန်ရေးအရှိန်မြင့်၍တိုက်ပွဲဝင်သွားမည်ဟု သစ္စာပြုကြောင်း ဒေါင်းလုလင် – LPDF တပ်ဖွဲ့က ထုတ်ပြန်ထားသည်။