လေးကေ့ကော်ဒေသသို့ဝင်လာသည့် စစ်ကောင်စီတပ်မှ ဗိုလ်မှူးအဆင့်ရှိ ဒုတပ်ရင်းမှူးနှင့် တပ်သားတစ်ဦး အလင်းဝင်

ကရင်အမျိုးသားအစည်းအရုံး(KNU) တပ်မဟာ (၆)နယ်မြေ လေးကေ့ကော်ဒေသသို့ စစ်ကြောင်းထိုး ဝင်ရောက်လာသည့် အကြမ်းဖက် စစ်ကောင်စီတပ်မှ ဗိုလ်မှူးအဆင့်ရှိ ဒုတပ်ရင်းမှူးတစ်ဦးနှင့် စစ်သားတစ်ဦးသည် ကော်ဘရာစစ်ကြောင်းထံ လက်နက်နှင့်အတူ အလင်းဝင်လာကြောင်း အဆိုပါ စစ်ကြောင်းက ယနေ့ထုတ်ပြန် သည်။

အကြမ်းဖက်စစ်ကောင်စီ ခမရ (၅၈၅) ဒု-တပ်ရင်းမှူး ဗိုလ်မှူးတင်လင်းအောင် နှင့် တပ်သားဟိန်းမင်းထွေးတို့သည် ကော်ဘရာ စစ်ကြောင်းထံ အလင်းဝင်လာရာ ၎င်းတို့နှင့်အတူ လက်နက်ငယ် သုံးလက်ပါဝင်ကြောင်း ဖော်ပြထားသည်။ မည်သည့်နေ့ရက်တွင် အလင်းဝင်လာသည်ဆိုသည်ကို ဖော်ပြမထားပေ။

အလင်းဝင်လာသည့် စစ်ကောင်စီတပ်ဖွဲ့ဝင်များနှင့် အတူပါလာသည့် လက်နက်ငယ်များမှာ MA -1 သေနတ် တစ်လက်၊ MA – 3 သေနတ်တစ်လက်၊ ပစ္စတိုတစ်လက်တို့ ဖြစ်ပြီး ကော်ဘရာစစ်ကြောင်းမှူး ဗိုလ်ကြီးတာပေါမှ လက်ခံရယူခဲ့သည်ဟု ထုတ်ပြန်သည်။

ထိုသို့ ပြည်သူ့ရင်ခွင်သို့ ခိုလှုံလာသော ပြည်သူ့ဘက်တော်သားများအား မိမိတို့စစ်ကြောင်းမှ လုံခြုံကောင်း မွန်စွာ စောင့်ရှောက်ပေးလျက်ရှိကြောင်း အသိပေးထားသည်။

Public Service Announcement

အမျိုးသားညီညွတ်ရေးအစိုးရ(NUG)၏ ကာကွယ်ရေးဝန်ကြီးဌာန အနေဖြင့်လည်း တပ်မတော်သားများ စစ်ကောင်စီ၏ အသုံးချခံအဖြစ်မှ ရုန်းထွက်ပြီး ပြည်သူနှင့်အတူ ရပ်တည်ကြရန် ယနေ့ တိုက်တွန်းချက်ထုတ်ပြန်ထားသည်။