ရန်ကုန်တိုင်း တိုက်ကြီးမြို့နယ် ဥက္ကံမြို့မှ ပျူစောထီးအဖွဲ့ခေါင်းဆောင်ကို ပစ်ခတ်တိုက်ခိုက်ခဲ့ကြောင်း အာဏာသိမ်းဆန့်ကျင်ရေးနှင့်ပြည်သူ့လွတ်မြောက် ရေးအဖွဲ့ (ACPLF)က အသိပေးသည်။
ဧပြီ ၃ရက် နံနက် ၈နာရီခန့်တွင် ပြည်သူလူထု၏ တိုင်ကြားချက်အရ ဥက္ကံမြို့နယ် ပျူစောထီးအဖွဲ့ခေါင်းဆောင် ပြောင်ကြီး (ခ)စိုးမိုးအောင်ကို ပစ်ခတ်တိုက်ခိုက်ခဲ့ရာ ဇက်ပိုးအားကျည်ထိမှန်ပြီး အရေးပေါ်အခြေအနေဖြင့် ဆေးရုံတင်လိုက်ရကြောင်း ACPLF က ထုတ်ပြန်သည်။
“ပြောင်ကြီး ခေါ် စိုးမိုးအောင်သည် အာဏာလုစစ်ကောင်စီတပ်ဖွဲ့ဝင်များနှင့် ပူးပေါင်း၍ ဥက္ကံမြို့နေ ပြည်သူလူထုထံမှ ငွေကြေးများမတရားကောက်ခံခြင်း၊ ၎င်းနှင့်မတည့်သူများ၊ ငွေကြေးပြည့်စုံသူများကို အမှုဆင်လိမ်လည်တိုင်ကြားကာ ဖမ်းဆီးစေခြင်း၊ ငွေညှစ်ခြင်း၊ အပြစ်မဲ့ပြည်သူများအပေါ် လက်နက်ပြအနိုင်ကျင့်ခြင်း၊ လူငယ်အချို့အားဖမ်းဆီးစေခြင်းများ ပြုလုပ်ခဲ့ကာ ၎င်းကြောင့် ဒုက္ခရောက်ရသူမိသားစုများ၊ ဖမ်းဆီးခံရသူများ ဥက္ကံမြို့တွင် အတော်များပြားလာခဲ့ပြီဖြစ်သော ကြောင့် ကျွန်ုပ်တို့အနေဖြင့် ယခုကဲ့သို့ အရေးယူခဲ့ရခြင်းဖြစ်ပြီး ဥက္ကံမြို့တွင် ကျန်ရှိနေသေး ၎င်း၏ အပေါင်းအပါများကိုလည်း ဆက်လက်အရေးယူသွားဦးမည်ဖြစ်ကြောင်း ပြည်သူလူထုအား အသိပေးတင်ပြအပ်ပါသည်”ဟု ACPLF က ထုတ်ပြန်သည်။
ယင်းတိုက်ခိုက်မှုနှင့်ပတ်သက်၍ အပြစ်မဲ့ပြည်သူ ၁၀ဦးခန့်ကို အကြမ်းဖက်စစ်ကောင်စီက ဖမ်းဆီးထားကြောင်း ယင်းအဖွဲ့မှတာဝန်ရှိသူတစ်ဦးက ပြောသည်။
Public Service Announcement
“အရင်ဆုံးပြောင်ကြီးလဲနေတာကို သတင်းပေးတဲ့လူ နှစ်ယောက်ကိုစစ်ဖို့ခေါ်သွားတယ်၊နောက်ဆက်တွဲအနေနဲ့ အခင်းဖြစ်တဲ့ရပ်ကွက် (အောင်ရတနာရပ်ကွက်)ထဲက အပြစ်မဲ့ပြည်သူ ၁၀ခန့်ကို ရဲစခန်းခေါ်သွားပါတယ်၊ ဖမ်းတာလား၊ ခေါ်စစ်တာလားမသိရသေးဘူး”ဟု ၎င်းက ပြောသည်။
