မြန်မာအမျိုးသား ဒီမိုကရက်တစ်မဟာမိတ်တပ်မတော် ဟုခေါ်ဆိုသည့် ကိုးကန့်တပ် (MNDAA)နှင့် စစ်ကောင် စီတပ်တို့ မတ်လကုန်ပိုင်းမှ ယမန်နေ့ (ဧပြီ ၄ရက်) အထိ တိုက်ပွဲသုံးကြိမ်ဖြစ်ပွားခဲ့ကြောင်း MNDAAက သတင်းထုတ်ပြန်သည်။
ဖေဖော်ဝါရီ ၁၆ရက်က ကွယ်လွန်ခဲ့သည့် MNDAA ခေါင်းဆောင် ဦးဖုန်ကြားရှင် ဈာပနကို မတ်လ ၂၉ရက်က မိုင်းလား၌ ကျင်းပခဲ့ပြီးနောက် မတ်လ ၃၀ ရက်မှစ၍ ရှမ်းပြည်နယ်မြောက်ပိုင်း မုံးကိုးခရိုင်တွင် တိုက်ပွဲများ ပြန်လည်ဖြစ်ပွားခဲ့သည်။
ဈာပနမပြုလုပ်မီကာလအတွင်း တိုက်ပွဲဖြစ်ပွားမှု နည်းပါးခဲ့ရာ မတ်လကုန်ပိုင်းမှစ၍ တိုက်ပွဲပြန်လည်ဖြစ်ပွားခဲ့ခြင်းဖြစ်သည်။
စစ်ကောင်စီ၏ တပ်မ(၉၉)လက်အောက်ခံတပ်ရင်း (၄၂၀)လူအင်အား(၈၀)တစ်စုသည် မုံးကိုးခရိုင် တာမိုင်းပေါ်ဒေသ၏မြစ်ချောင်း အနောက်ဘက်ရှိနေသည်ကို သတင်းရ၍ ဧပြီ ၄ရက် နေ့လယ်ပိုင်းတွင် စစ်ကောင်စီတပ်နေရာကို MNDAAက ဦးစွာပစ်ခတ်တိုက်ခိုက်ခဲ့ကြောင်း၊ စစ်ကောင်စီတပ်မှလည်း လက်နက်ကြီးများဖြင့် တောက်လျှောက် ပစ်ခတ်တိုက်ခိုက်ခဲ့ကြောင်း ဖော်ပြထားသည်။
Public Service Announcement
ယခုရက်ပိုင်းအတွင်း စစ်ကောင်စီသည် အထူးဒေသ(၁)၊ မုံးကိုးခရိုင် ၊ တာမိုင်းပေါ်ဒေသ ရှိ MNDAA တပ်စခန်းများကို မကြာခဏ ထိုးစစ်ဆင်တိုက်ခိုက်လာကြောင်း ထုတ်ပြန်သည်။
အဆိုပါ ဒေသတွင် ကချင်လွတ်လပ်ရေးတပ်မတော် (KIA) တပ်များလည်းရှိရာ စစ်ကောင်စီတပ်နှင့် တိုက်ပွဲဖြစ်ပွားမှုများရှိနေသည်။
