ရွှေဘိုနယ်ရှိ ​ကျေးရွာများတွင် တပ်စွဲထား​သော စစ်​​ကောင်စီတပ် နှစ်ကြိမ်တိုက်ခိုက်ခံရပြီး သုံးဦး​သေ

စစ်ကိုင်းတိုင်း၊ ရွှေဘိုမြို့နယ်တွင် ကျေးရွာများ၌ တပ်စွဲထားသော အကြမ်းဖက်စစ်ကောင်စီတပ်အား ဒေသတွင်းပြည်သူ့ကာကွယ်ရေးအဖွဲ့ ၇ ဖွဲ့က နှစ်ကြိမ်တိုင်သွား ရောက်တိုက်ခိုက်ခဲ့ပြီး အကြမ်းဖက်စစ်ကောင်စီတပ်ဘက်မှ သုံးဦးသေဆုံးကြောင်း SNAKE EYES PDFက သတင်းထုတ်ပြန်သည်။

ဧပြီ ၃ရက်က ရွှေဘိုမြို့နယ် တည်သီးတောရွာရှိ အထိုင်ချတပ်စွဲထားသော စစ်ကောင်စီအဖွဲ့ဝင်များကို SNAKE EYES PDF၊ C&T SHWEBO၊ PEPOLE DEFENCE FORCE SHWEBO၊ ALPHA-7၊ ဗိုလ်ကျားရိုင်း (ပ.က.ဖ)၊ THE GUYS OF BURMA REVOLUTION FORCE၊ ဒေါင်းမာန်အဖွဲ့ နှင့် တပ်ပေါင်းစု (၂)တို့မှ သွားရောက်ပူးပေါင်း တိုက်ခိုက်ခဲ့ရာ စစ်ကောင်စီဘက်မှ နှစ်ဦးသေဆုံးကာ ​လေးဦး ဒဏ်ရာပြင်းထန်စွာရသွားကြောင်း SNAKE EYES PDFက အသိပေးသည်။

ပြည်သူ့ကာကွယ်ရေးအဖွဲ့များကို ၆၀(မမ)များဖြင့် ပြန်လည်ပစ်ခတ်ခဲ့သော်လည်း ကာကွယ်ရေးအဖွဲ့များအားလုံး အထိအခိုက်မရှိ အောင်မြင်စွာပြန်လည်ဆုတ်ခွာနိုင်ခဲ့သည်ဟု ထုတ်ပြန်ချက်တွင် ဖော်ပြသည်။

ဧပြီ၂ ရက်ကလည်း ရွှေဘိုမြို့နယ်၊ ဇီးဖြူကုန်းရွာရှိ အထိုင်ချတပ်စွဲထားသော အကြမ်းဖက်စစ်ကောင်စီတပ်များအား SNAKE EYES PDF၊ C&T SHWEBO၊ PEPOLE DEFENCE FORCE SHWEBO၊ ALPHA-7၊ ဒေါင်းမာန်အဖွဲ့နှင့်တပ်ပေါင်းစု (၂)တို့မှသွားရောက် တိုက်ခိုက်ခဲ့ပြီး စစ်ကောင်စီဘက်မှ တစ်ဦးသေဆုံးကာ တစ်ဦးထိခိုက်ဒဏ်ရာရသွားကြောင်း SNAKE EYES PDFက ပြောသည်။

Public Service Announcement

ဆက်လက်၍ အနယ်နယ်အရပ်ရပ်ရှိ ကာကွယ်ရေးအဖွဲ့များပေါင်းစည်းကာ စစ်ကောင်စီအား ဆက်လက်တော်လှန်သွားမည်ဖြစ်ကြောင်း မိဘပြည်သူများအား လေးစားစွာအသိပေးပြီး အင်တာနက်အခက်အခဲကြောင့် နောက်ကျမှဖော်ပြရခြင်းဖြစ်ကြောင်း SNAKE EYES PDFက အသိပေးသည်။

အဆိုပါဖြစ်စဥ်များနှင့်ပတ်သက်၍ မဟာမိတ်အဖွဲ့များထံ ဆက်သွယ်​မေးမြန်းထားသော်လည်း ပြန်လည်ဖြေကြားခြင်းမရှိသေးပါ။

မတ်လ ၃၁ ရက်ကလည်း ရွှေဘိုမြို့နယ် မင်္ဂလာရွာနှင့်ဇီးကုန်းရွာကြားဂျိုက်ကာကွင်းထိပ်၌မိုင်းရှင်းလင်းရေးလုပ်နေသော စစ်ကောင်စီတပ်များအား အသင့်စောင့်ကြို၍ရှေ့ထွက်မိုင်း နှစ်လုံး ပါဆယ်မိုင်း ​လေးလုံးခွဲကာ တိုက်ခိုက်ခဲ့ရာ စစ်သားနှစ်ဦးသေဆုံးခဲ့သေးသည်။