မြန်မာစစ်တပ်၏ ရက်စက်ယုတ်မာမှုများအတွက် ပြစ်ဒဏ်ပေးခြင်းမှ ကင်းလွတ်ခွင့်ရနေမှုကို အဆုံးသတ်နိုင်ရေးအတွက် အမေရိကန်နိုင်ငံခြားရေးဝန်ကြီးဌာန ကမ္ဘာလုံးဆိုင်ရာရာဇဝတ်မှုတရားမျှတရေးရုံးက အမျိုးသားညီညွတ်ရေးအစိုးရ (NUG) ကိုယ်စားလှယ်များနှင့် ယမန်နေ့တွင် တွေ့ဆုံဆွေးနွေးသည်။
NUG လူ့အခွင့်အရေးဆိုင်ရာဝန်ကြီး ဦးအောင်မျိုးမင်း ဦးဆောင်သော ကိုယ်စားလှယ်အဖွဲ့သည် အမေရိကန်သို့ရောက်ရှိနေရာ လူ့အခွင့်အရေးအရေးပါမှု၊ နိုင်ငံတဝန်း ရက်စက်ယုတ်မာမှုပြုကျင့်ခံရသူအားလုံးအတွက် တရားမျှတမှု စသည်တို့ကိုလည်း ကမ္ဘာလုံးဆိုင်ရာရာဇဝတ်မှုတရားမျှတရေးရုံးက NUGကိုယ်စားလှယ်များနှင့်ဆွေးနွေးခဲ့သည်။
“အမေရိကန်နိုင်ငံခြားရေးဝန်ကြီးဌာန ကမ္ဘာလုံးဆိုင်ရာ ရာဇ၀တ်မှုနှင့်တရားမျှတမှုဆိုင်ရာ သံအမတ်ကြီးနဲ့ တွေ့ဆုံပြီး ရိုဟင်ဂျာများအပေါ် လူမျိုးတုန်းသတ်ဖြတ်မှုအား အကြမ်းဖက်စစ်တပ်က ကျူးလွန်ကြောင်းကို အမေရိကန်အစိုးရက လက်ခံကြေညာခဲ့အပြီး တရားမျှတမှု ဖော်ဆောင်နိုင်ရေးအတွက် NUGက ပူးပေါင်းလုပ်ဆောင်သွားမဲ့အကြောင်း ဆွေးနွေးခဲ့ပါတယ်”ဟု NUG လူ့အခွင့်အရေးဆိုင်ရာဝန်ကြီး ဦးအောင်မျိုးမင်းက အသိပေးထားသည်။
အထက်ပါ NUG ကိုယ်စားလှယ်အဖွဲ့၏ ခရီးစဉ်အတွင်း အမေရိကန်အစိုးရထိပ်တန်းတာဝန်ရှိသူ များ၊ လွှတ်တော်အမတ်များနှင့် တွေ့ဆုံကာ လူသားချင်းစာနာမှုအကူအညီပေးရေးဆိုင်ရာ ကိစ္စရပ်များ၊ မြန်မာစစ်တပ်၏ ကျူးလွန်မှုများနှင့်ပတ်သက်၍ တာဝန်ယူမှု၊ တာဝန်ခံမှုရှိစေရေးအတွက် ဆွေးနွေးသွားမည်ဟု ဆိုသည်။
Public Service Announcement
