ကေအဲန်ယူက မြ၀တီ-ကော့ကရိတ်အာရှလမ်းမနဲ့ မြ၀တီ-ဝေါ်လေ ကားလမ်းမ အသုံးပြုမှု ယာယီရပ်ဆိုင်းထားတာဟာ မှန်ကန်ပြီး ဆက်လက်ဆောင်ရွက်သင့်တယ်လို့ မြန်မာနိုင်ငံအလုပ်သမားတပ်ပေါင်းစုက ကြေညာချက်ထုတ်ပြန်ပါတယ်။
ပြီးခဲ့တဲ့ မတ်လ ၂၆ ရက်က ကေအဲန်ယူ-ဒူးပလာယာခရိုင် ကော့ကရိတ်မြို့နယ်က မြ၀တီ-ကော့ကရိတ်အာရှလမ်းမကြီးနဲ့ မြ၀တီ-ဝေါ်လေကားလမ်းမပိုင်း အသုံးပြုမှုကို ယာယီရပ်ဆိုင်းထားတယ်လို့ ထုတ်ပြန်ကြေငြာထားတာပါ။
မြ၀တီ-ကော့ကရိတ်အာရှလမ်းမနဲ့ မြ၀တီ-ဝေါ်လေ ကားလမ်းမကို ယာယီရပ်ဆိုင်းထားတာဟာ စစ်ကောင်စီရဲ့ဝင်ငွေတွေရပ်တန့်ဖို့နဲ့ ဝင်ငွေရရှိနိုင်တဲ့လမ်းကြောင်းကို ဖြတ်တောက်ထားတာဖြစ်တဲ့အတွက် အပြည်ပြည်ဆိုင်ရာနိုင်ငံတွေရဲ့ စီးပွားရေးပိတ်ဆို့အရေးယူဆောင်ရွက်မှုနဲ့ ထပ်တူကျမှန်ကန်တယ်လို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် ကေအဲန်ယူအနေနဲ့ ဖက်ဒရယ်ဒီမိုကရေစီကျင့်စဉ်နဲ့အညီ ကရင်ပြည်နယ်ဒေသတွေအတွင်း နယ်မြေစိုးမိုးမှု၊ ပြည်သူလူထုတစ်ရပ်လုံးရဲ့ အသက်၊ အိုးအိမ်စည်းစိမ်ကာကွယ်ဖို့အတွက် ကြိုးစားဆောင်ရွက်ခြင်းဖြစ်တာကို အသိအမှတ်ပြုပါတယ်လို့ ထုတ်ပြန်ချက်မှာ ပါရှိတာပါ။
ဒါကြောင့် မိမိတို့ဒီမိုကရေစီတော်လှန်ရေးအင်အားစုတွေက ကေအဲန်ယူ ဒူးပလာယာခရိုင် တပ်မဟာ ၆ ကော့ကရိတ်မြို့နယ်ရဲ့ ရပ်တည်ဆောင်ရွက်မှုတွေကို အားပေးထောက်ခံပြီး ဆက်လက်ဆောင်ရွက်သင့်ပါတယ်လို့ ထုတ်ပြန်ချက်မှာ ဆိုထားပါတယ်။
ရွှေ့ပြောင်းအလုပ်သမားတွေကလည်း နှစ်နိုင်ငံကိုဗစ်ရောဂါ ကာကွယ်ရေးအစီအစဉ်တွေနဲ့ သွားလာမှုခက်ခဲတဲ့ကာလ အလုပ်အကိုင်ရှားပါတဲ့ကာလတွေမှာ အာရှလမ်းမနဲ့ မြ၀တီ-ဝေါ်လေလမ်းမမှာ သွားလာမှုယာယီရပ်ဆိုင်းပြီး စစ်အုပ်စုကိုပြောင်းလဲဖို့ကြိုးစားမှုကို အလုပ်သမားတွေအနေနဲ့ နေရပ်မပြန်ခြင်းအားဖြင့် ပါဝင်ကူညီကြဖို့ မြန်မာနိုင်ငံအလုပ်သမားတပ်ပေါင်းစုက အကူအညီတောင်းခံထားပါတယ်။
မြန်မာနိုင်ငံအလုပ်သမားတပ်ပေါင်းစုဟာ မြန်မာနိုင်ငံအလုပ်သမားသမဂ္ဂများနဲ့ အလုပ်သမားအရေးဆောင်ရွက်နေကြတဲ့ အလုပ်သမားအဖွဲ့အစည်း(၁၈)နဲ့ စုဖွဲ့ထားတာဖြစ်တယ်လို့ အဲ့ဒီတပ်ပေါင်းစုရဲ့ထုတ်ပြန်ထားချက်အရ သိရပါတယ်။