အကြမ်းဖက်စစ်ကောင်စီ၏ အဓမ္မဖမ်းဆီးခံထားရသော မန္တလေးသပိတ်ခေါင်းဆောင် ကိုသူရအောင်သည် အသက်အန္တရာယ်အထူးစိုး ရိမ်ရသည့်အခြေအနေတွင် ရှိနေကြောင်း မန္တလေးသပိတ်အင်အားစုက ယနေ့(ဧပြီ ၁၁) ထုတ်ပြန်သည်။
ကိုသူရအောင်အား အကြမ်းဖက်စစ်ကောင်စီက ပြီးခဲ့သည့် ဖေဖော်ဝါရီ ၉ ရက်တွင် မတရားဖမ်းဆီးခဲ့ခြင်းဖြစ်ပြီး ဖမ်းဆီးခံရချိန်မှ ယနေ့အချိန်ထိ မိသားစုဝင်များ၊ မိတ်ဆွေများ၊ ရှေ့နေများနှင့် အဆက်အသွယ်မရသေးကြောင်း ထုတ်ပြန်ချက်တွင် ဖော်ပြသည်။
“ အဓမ္မ ဖမ်းဆီးခံထားရတဲ့ မန္တလေးသပိတ်ခေါင်းဆောင် ကိုသူရအောင်ဟာ ဖက်ဆစ် အကြမ်းဖက် စစ်အုပ်စုရဲ့ လူမဆန်စွာ ရက်စက်ကြမ်းကြုတ်လှတဲ့ စစ်ကြောရေးမှာ အသက်အန္တရာယ် ရှိနေတယ် (သို့မဟုတ်) ကျဆုံးသွားပြီဆိုတဲ့ သတင်းတွေ ကျယ်ကျယ်ပြန့်ပြန့် ကြားနေရပါတယ်” ဟု ထုတ်ပြန်သည်။
ထို့ကြောင့် ကိုသူရအောင် အသက်ဘေးအခြေအနေမှန်ကို သိရှိနိုင်ရေး၊ အသက်အန္တရာယ် ဘေးကင်းလုံခြုံမှုရှိရေး၊ မိသားစုဝင်များ၊ မိတ်ဆွေများနဲ့ အမြန်ဆုံး အဆက်အသွယ်ရရှိရေးတို့အတွက် အပြည်ပြည်ဆိုင်ရာ ကြက်ခြေနီကော်မတီ (ICRC)၊ လူ့အခွင့်အရေးဆိုင်ရာ အဖွဲ့အစည်းများ၊ ရှေ့နေရှေ့ရပ်များ၊ သံရုံးနှင့် သံတမန် အဖွဲ့အစည်းများအနေဖြင့် အရေးပေါ် ကြားဝင် ကူညီဆောင်ရွက်ပေးရန် မန္တလေးသပိတ်အင်အားစုက မေတ္တာရပ်ခံထားသည်။
Public Service Announcement
