ချင်းပြည်နယ် ဖလမ်းမြို့နယ် အခြေစိုက်ခလရ(၂၆၈)မှ တပ်သား ထက်မြတ်အောင်သည် လက်နက်အပြည့်စုံဖြင့်ချင်းအမျိုးသားကာကွယ်ရေးတပ်(CNDF)ထံ အလင်းဝင်လာကြောင်း ချင်းအမျိုးသားအဖွဲ့ချုပ်(CNO) က ယနေ့ (ဧပြီ ၁၈ရက်)တွင် ထုတ်ပြန်သည်။
တပ်သား ထက်မြတ်အောင် (ကိုယ်ပိုင်အမှတ် တ-၅၇၂၅၅၇ )အနေဖြင့် အကြမ်းဖက်စစ်ကောင်စီလက်အောက်တွင် ဆက်လက်တာဝန်ထမ်းဆောင်လိုခြင်း မရှိတော့၍ ပြည်သူနှင့်အတူပူးပေါင်းရန် CNO/CNDF ထံသို့ အလင်းဝင်ရောက်လာခြင်းဖြစ်သည်ဟု ဆိုသည်။
အဆိုပါတပ်သားကို CNO/CNDF မှလည်း ဆုကြေးငွေချီးမြှင့်ခဲ့ပြီး လွတ်မြောက်နယ်မြေသို့ ပို့ဆောင်ပေးခဲ့ကြောင်း အသိပေးထားသည်။
လက်ရှိတွင် စစ်ကောင်စီတပ်မှ ပြည်သူ့ရင်ခွင် ခိုလှုံလာသူ စုစုပေါင်း ၁၀,၀၀၀နီးပါး ရှိထားပြီး အကြောင်းအမျိုးမျိုးကြောင့် အပြင်မထွက်ဘဲအတွင်းထဲမှ သတင်းအချက်အလက် ပေးပို့နေသူများစွာ ရှိထားသည်ဟု အမျိုးသားညီညွတ်ရေးအစိုးရ ပြည်ထောင်စုဝန်ကြီးချုပ် မန်းဝင်းခိုင်သန်းက ယနေ့ ပြောကြားထားသည်။
Public Service Announcement
