ချင်းပြည်နယ် မင်းတပ်မြို့တွင် ယနေ့ နေ့လယ် ၂နာရီခန့်က မိုးသက်လေပြင်းကျခဲ့ပြီး စစ်ဘေးရှောင်စခန်းတစ်ခုမှ ယာယီတဲအိမ်အများအပြား ပျက်စီးခဲ့သည်။
ယနေ့(ဧပြီ ၁၈ရက်) နေ့လယ် ၂နာရီခန့်တွင် မင်းတပ်မြို့၌ မိုးနှင့် လေပြင်း တပြိုင်နက်ကျရောက်ခဲ့ခြင်းဖြစ်သည်။မိနစ်အနည်းငယ်သာ ကြာသည့် လေပြင်းကြောင့်အိမ်ထောင်စု ၁၀၀ ကျော်နေထိုင်သည့် စစ်ရှောင်စခန်းမှ တဲအိမ်များ ပျက်ဆီးသွားခဲ့ခြင်းဟု ဒေသခံတစ်ဦးကပြောသည်။
“စစ်ဘေးကိုကြောက်ပါတယ်ဆိုမှ သဘာဝဘေးက ထပ် ဒုက္ခပေးတယ်။ ယာယီတဲအိမ်တွေ တော်တော်များများ ပြိုကျပျက်စီးတယ်။ပြန်ပြင်ဖို့ အကူအညီတွေ လိုအပ်တယ် “ဟု ၎င်းက ပြောသည်။
ဧပြီသည် မိုးကြိုကာလဖြစ်ပြီး ဒေသအချို့တွင် လေထုမတည်မငြိမ်မှုကြောင့် မိုးကြိုးပစ်ခြင်း၊ လေပြင်းတိုက်ခတ်ခြင်းများ မကြာခဏဖြစ်ပေါ်နေသည်။
ဧပြီအတွင်း စစ်ကိုင်းတိုင်း ခင်ဦးမြို့နယ်၊ မန္တလေးတိုင်း မိုးကုတ်မြို့နှင့် ရှမ်းပြည်နယ် မူဆယ်နှင့်နမ်းခမ်းမြို့တွင် လေပြင်းဘေးကြုံတွေ့ခဲ့သည်။