စစ်ကိုင်းတိုင်း အရာတော်မြို့နယ်ရှိ ကျေးရွာတစ်ရွာတွင် တော်လှန်ရေးရဲဘော်များက သက်ကြီးရွယ်အို အဖိုး၊အဖွားများကို မြန်မာနှစ်သစ်ကူးအထိမ်းအမှတ်အဖြစ် ယနေ့ (ဧပြီ ၁၈) နှစ်ဆန်းနှစ်ရက်နေ့တွင် လိုက်လံ ဂါရဝပြုကန်တော့ခဲ့ကြသည်။
” ဒီကာလက ကျပ်တည်းတော့ အဖိုးအဖွားတွေကို ထောက်ပံ့ချင်တာရယ် နှစ်သစ်ကူးနဲ့လည်း ကြုံကြိုက်နေတော့ ဂါရဝပြုကြမယ်ဆိုပြီး ကျွန်တော်တို့ တက်နိုင်တာလေးနဲ့ စုပြီး လုပ်ဖြစ်သွားတာပါ။ တချို့အဖိုးအဖွားတွေဆို မျက်ရည်တွေကျပြီး ကျွန်တော်တို့ကို ကိုယ့်မြေးလေးတွေကိုမှာသလို အစစအရာရာ ဂရုစိုက်ဖို့မှာတယ်။ တချို့ကလည်း ၈၈ ကာလဖြတ်သန်းခဲ့ရတဲ့ အခက်အခဲ အတွေ့အကြုံတွေပြောပြပြီး စုစုစည်းစည်း ညီညီညွတ်ညွတ်နဲ့ လမ်းမှန်မှန်လျှောက်ဖို့ မှာတယ် ” ဟု လိုက်လံဂါရဝပြုခဲ့သူ ရဲဘော်တစ်ဦးက ရေးသားဖော်ပြခဲ့သည်။
ထိုသို့ ဂါရဝပြုသည့် လူငယ်များကို အဘိုး၊အဘွားများက “အရေးတော်ပုံ ၊အောင်ပါစေ” ဟု ဆုပေးခဲ့သည့်အတွက် ကြည်နူးဝမ်းသာရကြောင်း ရဲဘော်တစ်ဦးက ဆိုသည်။
တော်လှန်ရေးရဲဘော်များသည် ၎င်းတို့၏ မုန့်ဖိုးများ စုစည်းကာ ကျေးရွာရှိ အဖိုး၊ အဖွား (၃၃) ဦးအား စားစရာနှင့် ငွေကြေးအချို့ ဂါရဝပြုခဲ့ကြောင်းသိရှိရသည်။
Public Service Announcement
