▪️မန္တလေးအခြေစိုက် သပိတ်အင်အားစုများက အတည်မပြုနိုင်သေးဟုဆို
အကြမ်းဖက်စစ်ကောင်စီ၏ အဓမ္မဖမ်းဆီးခံထားရသော မန္တလေးသပိတ်ခေါင်းဆောင် ကိုသူရအောင်သည် ယမန်နေ့ (ဧပြီ ၁၈)ညပိုင်းတွင် စစ်ကြောရေး၌ သွေးအန်၍ ကျဆုံးခဲ့ကြောင်း သတင်းများထွက်ပေါ်လာသည်။
သို့သော် လက်ရှိပြန့်နှံ့နေသည့် ကိုသူရအောင်၏ သတင်းအပေါ်တွင် အတည်ပြုနိုင်ခြင်းမရှိသေးကြောင်း၊ မည်သူက၊ မည်သည့် ရည်ရွယ်ချက်နှင့် ဖြန့်ချီမှန်း မသိရကြောင်း၊ ကိုသူရအောင်၏ သတင်းမှန်သိရရေး ဆက်လက်ကြိုးစားလျက်ရှိကြောင်း မန္တလေးသပိတ်အင်အားစုက ယနေ့ (ဧပြီ ၂၀) အသိပေးထုတ်ပြန်သည်။
“ကိုသူရအောင် ကိစ္စနဲ့ပတ်သက်ပြီး ဖြစ်စဉ်မတူသော အခြေအနေများကို ကြားသိထားရပါတယ်။ ထိုသတင်းကို ခိုင်လုံနိုင်စေရန် ဆက်လက်စုံစမ်းနေဆဲ အခြေအနေတွင်ရှိနေပါသေးတယ် အခြေအနေအတည်ပြုနိုင်သည်နှင့်အမျှ သတင်းထုတ်ပြန်ပေးသွားပါမယ် “ဟု မန္တလေးသပိတ်အင်အားစုက ဖော်ပြထားသည်။
Public Service Announcement
ကိုသူရအောင်သည် ပြီးခဲ့သည့် ဖေဖော်ဝါရီ ၉ ရက်တွင် အကြမ်းဖက်စစ်ကောင်စီ၏ မတရားဖမ်းဆီးခံခဲ့ရပြီး ဖမ်းဆီးခံရချိန်မှ ယနေ့အချိန်ထိ မိသားစုဝင်များ၊ မိတ်ဆွေများ၊ ရှေ့နေများနှင့် အဆက်အသွယ်မရသေးကြောင်း သိရသည်။
ကိုသူရအောင်၏ အသက်ဘေးအခြေအနေမှန်ကို သိရှိနိုင်ရေး၊ အသက်အန္တရာယ် ဘေးကင်းလုံခြုံမှုရှိရေး၊ မိသားစုဝင်များ၊ မိတ်ဆွေများနဲ့ အမြန်ဆုံး အဆက် အသွယ်ရရှိရေးတို့အတွက် အပြည်ပြည်ဆိုင်ရာ ကြက်ခြေနီကော်မတီ (ICRC)၊ လူ့အခွင့်အရေးဆိုင်ရာ အဖွဲ့အစည်းများ၊ ရှေ့နေရှေ့ရပ်များ၊ သံရုံးနှင့် သံတမန် အဖွဲ့အစည်းများအနေဖြင့် အရေးပေါ် ကြားဝင် ကူညီဆောင်ရွက်ပေးရန်လည်း မန္တလေးသပိတ်အင်အားစုက (ဧပြီ ၁၁ရက်)က မေတ္တာရပ်ခံထားသည်။
လက်ရှိတွင် ကိုသူရအောင်အပါအဝင် စစ်ကောင်စီ၏ အဓ္ဓမ ဖမ်းဆီးခံထားထားရသည့် သပိတ်မှ ရဲဘော်များ၊ PDF ၊ UG များ၏ အခြေအနေမှာ စစ်ကြောရေး၌ ညှင်းပန်းနှိပ်စက် စစ်ဆေးခြင်းကို ခံနေရကြောင်း၊ ရဲဘော်များအတွက် ပြည်သူလူထုနှင့်အတူ သက်ဆိုင်ရာ အဖွဲ့အစည်းများ၏ကူညီမှုကို လိုအပ်နေကြောင်း မန္တလေးအခြေစိုက် Spring Diary သပိတ်အင်အားစုကလည်း ထုတ်ပြန်ဖော်ပြထားသည်။
