ဒေသခံများအား ယခင်အစိုးရက အခကြေးငွေဖြင့် မွေးမြူထိန်းကျောင်းစေခဲ့သည့် နွားနောက်များကို ပြည်သူ့အုပ်ချုပ်ရေးအဖွဲ့ပိုင်အဖြစ် သိမ်းဆည်းလိုက်ပြီဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ကြေညာသည်။
သမ္မတဦးဝင်းမြင့်အစိုးရလက်ထက်တွင် မွေးမြူရေးနှင့် ကုသရေးဌာနပိုင် နွားနောက်များကို ဒေသခံများအား အခကြေးငွေဖြင့် မွေးမြူထိန်းကျောင်းစေခဲ့ပြီး ယခုအခါ ပြည်သူ့အုပ်ချုပ်ရေးအဖွဲ့ပိုင်အဖြစ် သိမ်းဆည်းလိုက်ပြီဟု ဒေသခံလူထုအားအသိပေးချက်ကို ဧပြီ ၂၀ရက်က ထုတ်ပြန်ခြင်းဖြစ်သည်။
“နွားနောက်များနှင့် ပတ်သက်၍ မွေးမြူရေးနှင့်ကုသရေးဌာနမှ Non-CDM ဝန်ထမ်းများ၏ စွက်ဖက်ပြောဆိုမှုများသည် တရားမဝင်သောကြောင့် ပြည်သူများအနေ ဖြင့် အလေးထားခြင်းမပြုရန်၊ နွားနောက်ထိန်းကျောင်းသူများ အနေဖြင့်လည်း မိမိတို့ထိန်းကျောင်းသော နွားနောက်များကို ပုဂ္ဂိုလ်ရေးအကျိုးအတွက် အလွဲသုံး စား မပြုလုပ်ကြရန်၊ မွေးမြူရေးနှင့်ကုသရေး ဌာနပိုင်မွေးမြူထားသည့်နွားနောက်များကို မြို့နယ်ပြည်သူ့အုပ်ချုပ်ရေးအဖွဲ့ပိုင် နွားနောက်များအဖြစ် သိမ်းဆည်းပြီးကြောင်း အများပြည်သူများသိရှိစေရန်ကြေညာလိုက်သည်”ဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်သည်။
မင်းတပ်မြို့သည် ပြည်သူ့ကာကွယ်ရေးအဖွဲ့ အလွန်အားကောင်းသည့် မြို့ဖြစ်ပြီး မင်းတပ်မြို့နယ်ပြည်သူ့ကာကွယ်ရေးအဖွဲ့ CDF မင်းတပ်က စစ်ကောင်စီတပ်ကို ခုခံတိုက်ခိုက်နေသည်။ တစ်ချိန်တည်းတွင် မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ဒေသတွင်း ပြည်သူ့အုပ်ချုပ်ရေးယန္တရားလည်ပတ်အောင် စီမံနေသည်။
Public Service Announcement
နွားနောက်များသည် ပြည်သူ့အုပ်ချုပ်ရေးအဖွဲ့ပိုင်အဖြစ် ကြေညာလိုက်သလို ယခင်အစိုးရလက်ထက် ချေးငွေများကို စစ်ကောင်စီထံ ပြန်ဆပ်ရန်မလိုအပ်ကြောင်းနှင့် နွေဦးတော်လှန်ရေးပြီးဆုံး၍ ပြည်သူ့အစိုးရ တစ်ရပ်ပေါ် ပေါက်လာသောအခါမှပြန်ဆပ်ရန် ယမန်နေ့က သတင်းထုတ်ပြန်ခဲ့သည်။
